అసలు స్నేహితునికి శుభాకాంక్షలు చెప్పారా?

ఈ రోజు ప్రపంచమంతా స్నేహితులు దినోత్సవం జరుపుకుంటున్నాం. స్నేహితులందరికి బ్యాండులు కట్టి, సందేశాలు పంపి స్నేహభావాన్ని వ్యక్త పరుస్తున్నాం. అందరికి అన్నీ చెప్పి ఉంటాం కానీ, ఒక్కరిని మాత్రం మర్చిపోయాం.

మనకు ఒక స్నేహుతుడు/స్నేహితురాలు ఉన్నాడు/ ఉంది. జీవితంలో మనకు కలిగే పరిచయాలన్నీ ఈ జన్మకే పరిమితమైతే, అతడితో మనకు అనేక జన్మల నుంచి, ఆనాది నుంచి పరిచయం ఉంది. కొందరితో కొన్నే పంచుకుంటాం, కానీ ప్రాణస్నేహితునితో అన్నీ పంచుకుంటాం. మనలో సగంగా భావించినా, స్నేహితుడు వేరొక వ్యక్తి. కానీ మనలోనే ఒక స్నేహితుడు ఉన్నాడు. అతడు మన నుంచి వేరైనవాడు కాదు, మనకు అత్యంత సన్నిహితుడు. అతడు లేనేది ప్రాణం కూడా ఉండదు. అంత దగ్గరివాడు. మనం చెప్పుకుంటే కానీ, మన గురించి ఇతరులకు తెలియదు, అది సుఖమైనా, దుఃఖమైనా. కానీ ఇప్పుడు నేను చెప్తున్న వాడికి మన గురించి అన్నీ తెలుసు. మనం ప్రత్యేకించి చెప్పుకోవలసిన పనేలేదు. మన గురించి అన్నీ తెలిసినా, నోరు జారి ఎక్కడ ఎవరికి మన రహస్యాలు చెప్పడు. మనమే ఎక్కడో నోరు జారి చెప్పుకుంటేమేమో? అంత నమ్మకస్థుడు. మనం పట్టించుకోలేదని బాధపడడు, కోప్పడడు, అలగడు. అర్దం చేసుకున్నవారితో ఆడతాడు, పాడతాడు, నాట్యం చేస్తాడు, ఒక్కోసారి జోకులు కూడా వేస్తాడు. మీరు కొట్టిన, తిట్టినా, వ్యంగ్యాస్త్రాలు సంధించినా నవ్వుకోని క్షమించే కారుణ్యమూర్తి వాడు. కుళ్ళు, కోపం, ద్వేషం, అసూయ మొదలైన దుర్గుణాలే లేనీ సుగుణవంతుడు. ఆయన ఎవరో కాదు, మన నుంచి వేరు కానీ పరమేశ్వరుడు, పరబ్రహ్మ, పరమాత్మ. ఇప్పటికి మన పూజ గదిలో కూర్చుని ఎప్పుడు స్నేహితుల దినోత్సవం శుభాకాంక్షలు చెప్తామా? అని ఎదురు చూస్తున్నాడు. పూజ గదిలో ఏంటి, మదిలో, హృదయకూహరంలో ఇంకా ఎదురు చూస్తున్నాడు. ఇంకెందుకు ఆలస్యం, ఇప్పుడే చెప్పండి మరి.

ఒకప్పుడు కుచేలుడు ఏమి లేక, అటుకులు ఇద్దామని తీసుకెళ్ళి, సిగ్గు పడుతూ, అటుకులు దాచుకుంటే, నా కోసం ఏమి తేలేదా? అంటూ అడిగిమరి అటుకులు తీసుకుని తనకంటే అధిక సంపద ఇచ్చాడు శ్రీ కృష్ణుడు. తాను భగవంతుడై ఉండి, కన్నీటితో ఒక మానవమాత్రుడి పాదాలను కడిగాడు. ఎందుకు? కేవలం తన పట్ల స్నేహ భావంతో మెలిగినందుకు, జీవితాంతం గుర్తుంచుకున్నందుకు. అటువంటి పరమాత్మకు శుభాకాంక్షలు చెప్పడానికి ఇంకా ఆలస్యం ఎందుకు? ఇంకా మీరు చెప్పలేదేమని ఎదురు చూస్తున్నాడు. ఇప్పుడే చెప్పండి. ఆనందంతో, ప్రేమతో, నిన్ను మర్చిపోలేదు, అందరూ నా మీద కోపగించుకున్నా, నాకు ఎప్పుడు తోడుగా ఉంటూ, నాతో పాటు అన్ని జన్మలు కలిసి ప్రయాణం చేసిన పరమాత్మ, నీకు స్నేహితుల దినోత్సవం శుభాకాంక్షలు అని చెప్పండి. మీకు ఎవరు ఇష్టదైవమో, వారికి చెప్పండి. సఖ్యం, నవవిధ భక్తి మార్గాల్లో ఒకటి.