Monday 24 January 2022

శ్రీ హనుమద్భాగవతము (140)



దుఃఖశమనుడు, మహావీరుడు నగు శ్రీ ఆంజనేయుడు విషయములను అన్నిటిని విన్నవించి నవనీరద సుందరుడైన శ్రీరామచంద్రుని ముఖారవిందమును రెప్ప వేయక చూచుచుండెను. రుద్రావతారుని వచనములును ఆలకించి ప్రభువు అత్యంత ప్రసన్నుడై ఇట్లు పల్కెను.


శ్లో॥ కార్యం కృతం హనుమతా దేవైరపి సుదుష్కరమ్ | 

మనసాపి యదన్యేన స్మర్తుం శక్యం న భూతలే ||

శతయోజనవిస్తీర్ణం లంఘయేత్క : పయోనిధిమ్ | 

లంకాంచ రాక్షసైర్గుప్తాం కోవా ధర్షయితుం క్షమః || 

భృత్యకార్యం హనుమతా కృతసర్వమ శేషతః | 

సుగ్రీవస్యేదృషో లోకే న భూతో న భవిష్యతి ||

అహం చ రఘువంశశ్చ లక్ష్మణశ్చ కపీశ్వరః | 

జానక్యా దర్శనేనాద్య రక్షితాః తాః స్మోహనూమతా || ( ఆ.రా. 6.1.2 5 )


శ్రీ ఆంజనేయుడు ఒనరించిన ఈ కార్యము దేవతలకైనా అత్యంతకఠినము. ఈ పృథ్వీతలముపై ఆ విషయమును ఎవ్వరైనను మనస్సులో స్మరింపనైనను స్మరింపజాలరు. శతయోజన విస్తీర్ణమైన సముద్రమును లంఘించి రాక్షసులచే సురక్షితమైన లంకాపురమును ధ్వంసమొనరించుటలో మఱియొకరెట్లు సమర్థులు కాగలరు. శ్రీ ఆంజనేయుడు సేవక ధర్మమును బాగుగా పూర్తి చేసెను. ఈ సంఘటన వెనుక జరుగలేదు, ముందు జరుగబోదు. ఈ పవనాత్మజుడు సీతాదేవిని కనుగొని నేడు నన్ను, లక్ష్మణుని, రఘువంశమును, సుగ్రీవాదులను అందఱిని రక్షించినాడు.


తదనంతరము సీతాపతియైన శ్రీరాముడు కిష్కిందాధిపతియైన సుగ్రీవునితో ఇట్లు పలికెను. “మిత్రమా! సుగ్రీవా! ఈ సమయములో విజయమను ముహూర్తము జరుగుచున్నది. ఈ క్షణమే సమస్త వానరసైన్యమును లంకా నగరమును ముట్టడించుటకు బయలు దేరవలసినదిగా ఆ దేశమిమ్ము. ఈ ముహూర్తములో జైత్రయాత్రకు బయలుదేరి నేను అసురసహితముగా దుర్జయుడైన దశాననుని సంహరించి సీతా దేవిని రక్షించెదను.


No comments:

Post a Comment