స్వామి శివానంద విరచిత గురుతత్వము - 36 వ భాగము

221. గురుసేవ ఎంతో శుద్ధిని పవిత్రతను ఇస్తుంది.
222. ఆత్మ సాక్షాత్కారానికి గురు-అనుగ్రహము అత్యవసరము.
223. భగవంతుని పట్ల ఉన్నంత భక్తి గురువు పట్ల కూడా కలిగి ఉండు. అప్పుడు మాత్రమే నీకు సత్యము వెల్లడవుతుంది.
224. సర్వకాల సర్వావస్థల్లో ఒకే గురువునకు కట్టుబడి ఉండు.
225 దేశకాలాలకు లోబడని ఈశ్వరుడే ఆదిగురువు. అనాది కాలం నుంచి మానవాళికి ఆయనే గురువు.
226. నిద్రాణమై ఉన్న కుండలినీ శక్తిని జాగృతం పరుచుటకు గురువు అత్యంత ఆవశ్యకము.
227. శిష్యునిగా జీవితాన్ని ప్రారంభించడం అంటే అహంకారాన్ని అంతం చేయడమే.
228. శిష్యత్వానికి బ్రహ్మచర్యం మరియు గురుసేవ అనేవి ముఖ్యమైనవి.
229. శిష్యత్వానికి అసలైన రూపం గురువు పట్ల భక్తి కలిగి ఉండుట.
230. శిష్యునిగా రూపాంతరం చెందాడనడానికి ముఖ్యమైన గుర్తు శ్రీ గురుని పవిత్ర పాదాలకు జీవితాన్ని అంకితమిచ్చుట.
231. గురుదేవుని రూపం మీద నిరంతర ధ్యానమే శిష్యాత్వానికి రాజ మార్గము.
232. శ్రీ గురుని పట్ల సంపూర్ణ విధేయత కలిగి ఉండుటయే శిష్యత్వానికి పునాది.
233. గురువు దొరకాలని, ఆయన్ను కలవాలని తీవ్రమైన తపన కలిగి ఉండటం మరియు ఆయనకు సేవలు చేయటమే ముముక్షత్వం.
234. దేవతలు, ద్విజులు, ఆధ్యాత్మిక గురువులు మరియు జ్ఞానులను పూజించడం, పరిశుద్ధత/ పవిత్రత, ముక్కుసూటితనం, బ్రహ్మచర్యం మరియు అహింస అనేవి శరీరానికి చెందిన తపస్సులు.
235. బ్రాహ్మణులకు, పవిత్రమైన గురువులకు మరియు జ్ఞానులకు నమస్కరించుట, బ్రహ్మచర్యము మరియు అహింస అనేవి భౌతిక తపస్సుగా చెబుతారు.
236. తల్లిదండ్రులకు మరియు గురువులకు, ఆర్తులకు మరియు రోగులకు, పేదవారికి సేవ చేయటం కూడా శారీరకమైన తపస్సే అవుతుంది.
237. పరిస్థితులకు అనుగుణంగా సర్దుకోవడం చాలా అరుదుగా వచ్చే సద్గుణము. దానివలన శిష్యుడు తాను ఎలాంటి వాడైనప్పటికీ గురువుకి తగ్గట్లుగా నడుచుకుంటూ, ఆయనకు అనుకూలంగా ఉంటూ సర్దుకొని జీవిస్తాడు.
238. ఈరోజు చాలా మంది సాధకులకు గురువు తగ్గట్టుగా సర్దుకుని జీవించడం ఎలాగో తెలియదు.
239. తన గురువుకు తగినట్లుగా సర్దుకుని కుదురుగా ఉండటం ఎలగో శిష్యుడు తప్పకుండా తెలుసుకోవాలి.
240. గురుభక్తిని వృద్ధి పరచుకొనుటకు వినయము మరియు విధేయత అవసరము.

స్వామి శివానంద విరచిత గురుతత్వము - 35 వ భాగము

205. గురువే నీకు నిజమైన రక్షకుడు మరియు ముక్తి నిచ్చువాడు. ఆయనను ఎల్లవేళలా గౌరవించి పూజించు.
206. గురు స్థానాన్ని పొందాలి అనుకోవడమే ఒక భయంకరమైన శాపము.
207. సత్, చిత్, ఆనంద స్వరూపుడై నీ గురువు ముందు ప్రతిరోజు సాష్టాంగ నమస్కారం చేయి.
208. శిష్యుడు తన గురువు రూపాన్ని గుర్తుంచుకోవాలి, గురువు యొక్క పవిత్ర నామాన్ని మననం చేయాలి, గురువు ఆజ్ఞను పాటించాలి మరియు గురువు గురించి తప్ప అన్యమైన వాటి గురించి ఆలోచించకూడదు. సాధనలోని రహస్యమంతా ఇక్కడే ఇమిడి ఉంది.
209. గురువు కంటే గొప్ప వాడు లేడనే విధంగా ప్రతి వ్యక్తి గురువును గౌరవించాలి.
210. శ్రీ గురుచరణామృతము సంసారమనే సాగరాన్ని ఎండగట్టి ఆత్మసాక్షాత్కారమనే అత్యవసరమైన సంపద పొందేలా చేస్తుంది.
211. గురుని యొక్క చరణామృతము శిష్యుని దాహాన్ని/ తృష్ణను తీరుస్తుంది.
212. నీవు ధ్యానమునకు కూర్చున్న సమయంలో నీ గురువు మరియు ఋషులను స్మరించు. వారి దీవెనలు అందుతాయి.
213. మహాత్ములు చెప్పే జ్ఞానవంతమైన మాటలు విని వాటిని అనుసరించు.
214. శాస్త్రాలు మరియు గురు ఏది సరైనదని చెప్పారో, ఆ కర్మలనే ఆచరించు.
215. శాంతికి మార్గాన్ని చూపుటకు గురువు ఖచ్చితంగా అవసరము.
216. 'వాహే గురు' అనేది గురు నానక్ అనుయాయులకు గురు-మంత్రం. గురు గ్రంథ సాహిబ్ చదువు. గురువు యొక్క గొప్పతనం తెలిసి వస్తుంది.
217. గురువును ఎల్లప్పుడు గుర్తు పెట్టుకొని పూజిస్తూ ఉండు. నువ్వు ఆనందాన్ని పొందుతావు.
218. శాస్త్రములందు, గురువాక్యముల యందు, ఈశ్వరుని యందు మరియు తన ఆత్మ యందు ఉన్న విశ్వాసమే శ్రద్ధ.
219. ఎటువంటి ఫలితం ఆశించకుండా గురుసేవ చేయడమే ఉత్కృష్టమైన సాధన.
220. సద్గురుని పాదపద్మాల వద్ద కూర్చుని శృతులను వినడమే శ్రవణము.

స్వామి శివానంద విరచిత గురుతత్వము - 34 వ భాగము

185. గురువును సేవించుట కొరకే జీవించి ఉండు.
186. తెల్లవారుజామున నాలుగు గంటలకు నిద్ర మేలుకో. గురు రూపం మీద ధ్యానం చేయుటకు ఈ సమయం ఎంతో అనుకూలమైనది.
187. గురువు గారి ఇంట్లో ఉంటున్న సమయంలో శిష్యుడు ఎంతో సంతృప్తితో జీవించాలి. అతడు పూర్తి నిగ్రహాన్ని పాటించాలి.
188. గురువు ముందు శిష్యుడు చాలా మృదువుగా, ప్రియంగా మరియు సత్యమే మాట్లాడాలి. ఎన్నడూ చెడుగాలేదా దురుసుగా మాట్లాడకూడదు.
189. శిష్యుడు గురువుకు వెన్నుపోటు పొడవకూడదు.
190. ఎవరైతే తన గుర్వుకు వెన్నుపోటు పొడుస్తాడో, అతడు రౌరవమనే నరకానికి వెళతాడు.
191. తినడం కోసం బ్రతికే వాడు పాపాత్ముడు కానీ తన గురువును సేవించడం కోసం తినే వాడు నిజమైన శిష్యుడు.
192. గురువు మీద ధ్యానం చేసే వారికి చాలా తక్కువ ఆహారం అవసరమవుతుంది.
193. గురు సేవ చేయకుండా ఆధ్యాత్మిక గ్రంథాలను అధ్యయనం చేయడం కాలాన్ని వృధా చేసుకోవడమే.
194. గురువుగారికి గురుదక్షిణ ఇవ్వకుండా ఆధ్యాత్మిక గ్రంథాలను నేర్చుకోవాలని అనుకోవడం కాలయాపన లేదా కాలాన్ని వృధా చేసుకోవడమే.
195. గురువుగారి సంకల్పాలను లేదా కోరికలను నెరవేర్చకుండా, కేవలం వేదాంత గ్రంథాలు, ఉపనిషత్తులు మరియు బ్రహ్మసూత్రాలు పఠించడం వలన ఎలాంటి మేలు కలగదు లేదా జ్ఞానము రాదు.
196. ఎంతోకాలం సేవ చేసిన తర్వాత శుద్ధమైన మరియు ప్రశాంతమైన మనస్సే గురువు అవుతుంది.
197. నీకు నచ్చిన అన్ని ఆధ్యాత్మిక గ్రంథాలను పఠించు, ప్రపంచమంతా సంచరిస్తూ ఆధ్యాత్మిక ప్రవచనాలు ఇవ్వు, వేల ఏళ్ళు హిమాలయగుహల్లో గడుపు, సంవత్సరాల తరబడి ప్రాణాయామం చేయి, జీవితమంతా శీర్షాసనం వెయ్యి, కానీ గురువు యొక్క అనుగ్రహం లేకుండా నీవు ముక్తిని పొందలేవు.

198. బ్రహ్మము ఏది అనేది చెప్పటం లేదా చూపించడం గురువుకు అసాధ్యమైనా, లేదా తనకు ఇంతకు ముందు ప్రత్యక్ష జ్ఞానము లేకపోవడం వలన శిష్యుడు అర్థం చేసుకొనుట కష్టమైనప్పటికీ, గురువు యొక్క అనుగ్రహం చాలా నిగూఢమైన పద్ధతిలో పనిచేసి శిష్యుడు ప్రత్యక్షంగా/అపరోక్షంగా పరబ్రహ్మ తత్వాన్ని తెలుసుకొనుటకు సహాయపడుతుంది.

199. తల్లి, తండ్రి మరియు ఇతర పెద్దలును నీ గురువుగా భావించు.

200. గురువు అంగీకరిస్తే ఆయనకు పాదసేవ చెయ్యి.

201. ప్రతి వ్యక్తి గురువు యొక్క సహాయముతో, తన సొంత జ్ఞానముతో మరియు వేదాంత వాక్యాల యొక్క నిజమైన ప్రాముఖ్యాన్ని అర్థం చేసుకొనుట ద్వారా తనలోనే ఉన్న ఆత్మను తెలుసుకోవాలి.

202. ఒక వ్యక్తికి గురువు లేదా ఆధ్యాత్మిక మార్గదర్శి ఉన్నప్పటికీ, అతడు తన సొంత ప్రయత్నంతోనే అన్ని రకాల కోరికలు, వాసనలు మరియు అహంకారాన్ని నిర్మూలించుకుని, ఆత్మసాక్షాత్కారం పొందాలి.

203. గురువు దగ్గరకు వెళ్ళాలంటే మీకు సరైన అధికారము/అర్హత ఉండాలి. నీవు వైరాగ్యము, వివేకము, మానసిక ప్రశాంతత, ఆత్మనిగ్రహం మరియు యమమ్య్ కలిగి ఉండాలి.

204. ఒక వేళ నీవు గనక మంచి గురువులు లేరని అంటే, గురువు కూడా మంచి శిష్యులు లేరనే అంటారు. శిష్యునికి కావలసిన అర్హతలు నీలో కలిగి ఉండు. నీకు సద్గురు లభిస్తాడు.

స్వామి శివానంద విరచిత గురుతత్వము - 33 వ భాగము

166. నీ మనసును శ్రీహరి, శివుడు, కృష్ణభగవానుడు, నీ గురువు లేదా మరే ఇతర బుద్ధుని వంటి యోగి యొక్క రూపం మీద కేంద్రీకరించు/నిలుపు. మరల మరల మానసికంగా వారి రూపాన్ని గుర్తు చేసుకునే ప్రయత్నం చేయి. ఆలోచనలన్నీ నశించిపోతాయి. ఇది మరొక పద్ధతి, భక్తుల పద్ధతి.
167. విధేయత అనేది అమూల్యమైన సద్గుణము. ఎందుకనగా నీవు ఈ సద్గుణాన్ని వృద్ధి పరుచుకునే ప్రయత్నం చేస్తే, ఆత్మసాక్షాత్కార మార్గానికి బద్ధ శత్రువైన అయిన అహంకారము మెల్లిమెల్లిగా నశించిపోతుంది.
168. గురువు పట్ల సంపూర్ణ విధేయత కలిగి ఉండటం అనేది కష్టమైన పని. కానీ నిజాయితీతో ప్రయత్నం చేస్తే అది సులభమవుతుంది.
169. మనము చేసే మామూలు పనికి కూడా ఎంతో శ్రమ అవసరం. అలాగే ఆధ్యాత్మిక పథంలో ప్రతి వ్యక్తి ఒక రకమైన క్రమశిక్షణ కలిగి ఉంటూ విధేయతను వృద్ధి పరుచుకునేందుకు సిద్దపడి ఉండాలి.
170. పూజించడం, మాల సమర్పించడం మరియు మనలో ఉన్న ఇతరుల పట్ల ఉండే పూజ్యభావాన్ని మరియు గౌరవాన్ని ప్రకటించే ఇతర బాహ్యమైన చర్యల కంటే గురువు పట్ల విధేయత కలిగి ఉండడమే ఉన్నతోన్నత మైనది.
171. గురువుకు విధేయత చూపడమే గురువు పట్ల నిజమైన గౌరవాన్ని చూపించటం.
172. విధేయత చూపటం అంటే గురువు మనం ఏ విధంగా నడుచుకోవాలని భావిస్తారో ఆ విధంగా నడుచుకునే ప్రయత్నం చేయుట.
173. ఒకవేళ గురువు గనక ఒక విషయాన్ని ఒప్పుకోరు లేదా ఇష్టపడరని తెలిస్తే, శిష్యుడు ఆ పని చేయకూడదు. అది కూడా విధేయతే అవుతుంది.
174. గురుసేవా యోగమంటే గురువుకు నిస్వార్ధంగా సేవ చేయటం అనే ఒకానొక యోగము.
175. గురు సేవ చేయటం అంటే సమస్త మానవాళికి సేవ చేయటం.
176. గురుసేవ మనసులోని మలినాలను తొలగిస్తుంది. హృదయాన్ని శుద్ధి చేయడంలో ఇది ఎంతో ప్రభావవంతమైనది. కనుక భావ యుక్తంగా మరియు భక్తితో గురువును సేవించండి.
177. గురు సేవ చేయటం అనేది మనస్సును జ్ఞానము, అనుగ్రహము మరియు దివ్యప్రకాశాన్ని స్వీకరించేందుకు సిద్ధం చేస్తుంది.

178. గురు సేవ హృదయాన్ని విశాలపరిచి, అన్ని రకాల అడ్డుగోడలను కూల్చివేస్తుంది. హృదయాన్ని శుద్ధి చేసుకొనుటకు గురుసేన అనేది ప్రభావవంతమైన సాధన.

179. గురువును సేవించడం వలన మనస్సు ఎల్లవేళలా చురజగా మరియు జాగురూకతతో ఉంటుంది.

180. గురు సేవ వలన వ్యక్తిలో దయ, వినయం, విధేయత, ప్రేమ, విశ్వాసం, భక్తి, సహనము, ఓర్పు, క్షాన్తి, త్యాగము మొదలైన గుణాలు అభివృద్ధి చెందుతాయి.

181. గురుసేవ ఈర్ష్యా, ద్వేషము మరియు తానే అధికుడినన్న భావనను నశింపజేస్తుంది.

182. గుర్వును సేవించేవాడు 'నాది', 'నేను' అనే భావాలను అధిగమిస్తాడు.

183. గురు సేవ చేయటం అంటే వాస్తవంలో శిష్యుడు తనను తానే సేవించుకోవడం.

184. గురుసేవా యోగాన్ని ఆచరించడంలో అనిర్వచనీయమైన ఆనందం మరియు శాంతి ఉన్నాయి.

స్వామి శివానంద విరచిత గురుతత్వము - 32 వ భాగము

153. శిష్యుడు మొట్టమొదటగా తన గురువు యొక్క అనుగ్రహాన్ని పొంది ఆయన చూపిన మార్గంలో నడవాలి.
154. శిష్యుడు గురువు యొక్క ఇంట్లోనే ఉంటూ ఇంద్రియ నిగ్రహాన్ని కలిగి ఉంటూ, గ్రంథాధ్యానం చేయాలి.
155. చద్ది అన్నము లేక పంచభక్ష పరమాన్నాము, మంచిదో, చెడ్డదో, ఎక్కువో, తక్కువో, ఏదైతే గురువు యొక్క పవిత్రమైన హస్తాల ద్వారా వస్తుందో/ అందుతుందో, ఆ ఆహారాన్నే శిష్యుడు స్వీకరించాలి/భుజించాలి.
156. మనస్సు యొక్క నీచమైన ప్రకృతిని శుద్ధి చేసుకోవాలి. శిష్యుడు గురువుకు ఈ విధంగా చెబుతాడు- "నాకు యోగాభ్యాసం చేయాలని ఉంది. నిర్వికల్ప సమాధిని పొందాలని ఉంది. మీ యొక్క పాదపద్మముల ముందు కూర్చోవాలని ఉంది. నేను మిమ్మల్ని శరణువేడాను". కానీ అతడు తన నీచమైన/ అల్పమైన ప్రకృతిని మరియు అలవాట్లను, అతని పాత స్వభావాన్ని, వ్యవహరించే తీరును, నడవడికను మార్చుకోడు.
157. అల్పమైన ప్రకృతిని మార్చడం అంత సులభం కాదు. అలవాట్ల యొక్క శక్తి చాలా బలంగా మరియు మొండిగా ఉంటుంది. దానికి ఎంతో సంకల్ప బలం ఉండాలి. సాధకుడు తన పూర్వపు అలవాట్ల యొక్క శక్తి వలన బలహీనుడిని భావిస్తాడు. అతడు నిరంతర జపము, కీర్తనము, ధ్యానము, నిస్వార్థ సేవ, సత్సంగము మరియు అలుపు చెందని స్వభావము ద్వారా తన సత్త్వాన్ని మరియు సంకల్ప బలాన్ని ఎంతో వృద్ధి చేసుకోవాలి. అతడు తనలోని దోషాలను ఆత్మపరిశీలన చేసుకుని తన యొక్క లోపాలను మరియు బలహీనతలను గ్రహించాలి. అతడు గురువు యొక్క మార్గదర్శనంలో జీవించాలి. గురువు శిష్యుని దోషాలను గ్రహించి/తెలుసుకుని వాటిని నిర్మూలించేందుకు తగిన మార్గాలను సూచిస్తాడు.
158. మోక్షాన్నిచ్చే నాలుగు సాధనాలను నీవు అలవర్చుకొని, అప్పుడు బ్రహ్మ శ్రోత్రియుడు, బ్రహ్మ నిష్ఠుడైన గురువు దగ్గరికి వెళ్ళాలి. నీ సందేహాలను నివృత్తి చేసుకోవాలి. గురువు ఇచ్చిన ఆధ్యాత్మిక ఉపదేశం అనే సహాయంతో ఆధ్యాత్మిక మార్గంలో ముందుకు సాగాలి. నీవు సరైన విధంగా మలుచుకునే వరకు, ఆయనతోనే జీవించాలి. జీవన్ముక్తి పొందిన మహాత్ముని నీతో వ్యక్తిగత సంబంధము కలిగి ఉండడం ఎంతో ఉన్నతిని కలిగిస్తుంది. నీకు తపన మరియు నిజాయితీ ఉంటే నీ గురువు చెప్పిన సూచనలు తప్పకుండా ఖచ్చితంగా పాటిస్తే, నీవు నిరంతరం తీవ్రమైన ధ్యానం చేస్తే, పరమ లక్ష్యాన్ని ఆరు నెలల లోపే సాధిస్తావని చెప్పడంలో ఎటువంటి సందేహము లేదు. దీన్ని నా మాటగా తీసుకో. ఇది ఖచ్చితంగా జరిగి తీరుతుంది.
159. ఈ ప్రపంచమంతా ప్రలోభాలతో మరియు దురాకర్షణలతో నిండి ఉంది. కాబట్టి కొత్తగా సాధన మొదలు పెట్టినవారు చాలా జాగ్రత్తగా ఉండాలి. వారు సరైన విధంగా రూపుదిద్దుకునే వరకు, ధ్యానంలో ఒక స్థాయికి చేరుకునే వరకు, వారు గురువు యొక్క పాదపద్మాల వద్ద కూర్చోవాలి. ఎవరైతే మొదటి నుంచి స్వతంత్రంగా ఉంటూ, ఇష్టం వచ్చినట్టు తిరుగుతూ, గురువు గారి మాట పట్ల ఏ విధమైన శ్రద్ధ చూపించరో, వారు నిరాశాజనకమైన ఫలితాలకు దృష్టాంతాలు గా మారతారు. వారు లక్ష్యం లేని జీవితాన్ని గడుపుతూ, దశదిశ లేకుండా ప్రవాహానికిఅటు నుంచి ఇటు కొట్టుకుపోతున్న చెక్క దుంగ లాగా, సంసార సాగరంలో మునుగుతూ తేలుతూ ఉంటారు.
160. మూర్ఖమైన శిష్యుడు తన పాత అలవాట్లనే పట్టుకుని ఉంటాడు. అతడు భగవంతునికి లేదా తన గురువుకి శరణాగతి చేయడు.
161. శిష్యుడు నిజంగా మెరుగుపడాలి అనుకుంటే అతను తన గురువు ముందు ముక్కుసూటిగా మరియు నిష్కపటంగా ఉండాలి.
162. విధేయత లేనివాడు, క్రమశిక్షణను ఉల్లంఘించి వాడు, తన గురువు ముందు యధార్ధముగా మాట్లాడనివాడు, ముక్కుసూటిగా మాట్లాడకుండా తన భావాలను దాచుకునేవాడు, గురువు లేదా ఆధ్యాత్మిక మార్గదర్శి కొరకు తన హృదయాన్ని తెరువలేనివాడు గురు వలన ఏ విధంగానూ లాభపడడు. అతడు తాను ఏర్పరుచుకున్న ఊబి లేదా బురదలో కూరుకుపోయి, ఆధ్యాత్మికపథంలో ఉన్నతిని పొందడు. ఎంత దయనీయమైన పరిస్థితి. నిజానికి అతనిది ఎంతో దౌర్భాగ్యము.
163. శిష్యులు భగవంతుడు లేదా గురువుకు సంపూర్ణముగా, నిష్కపటంగా, లోపరహితంగా, ఏ విధమైన ఫలములు ఆశించకుండా ఆత్మ సమర్పణ లేదా శరణాగతి చేయాలి.
164. గురువు చేయగలిగినదల్లా తన శిష్యులకు సత్యాన్ని ఎఱుకపరుచుకునే లేదా దివ్యజ్ఞానాన్ని తన ముందు ఉంచే మార్గాన్ని మాత్రమే తెలుపగలరు.
165. మోక్షానికి తగిన నాలుగు సాధనాలు కలిగి ఉన్న శిష్యుయ్డు, గురువు పాదాల వద్ద కూర్చుని శృతులను (వేదాలను) శ్రవణం చేస్తాడొ, తత్వమసి మొదలైన మహావాక్యాల ప్రముఖతను తెలుసుకొని, అటు తర్వాత లోతుగా విచారణ చేస్తాడు.

స్వామి శివానంద విరచిత గురుతత్వము - 31 వ భాగము

131. గురువు పట్ల మర్యాదతో ప్రవర్తించడం కంటే విధేయత కలిగి ఉండటమే కంటే ఉత్తమమైనది.
132. గురువు పట్ల విధేయత కలిగి ఉండటం అనేది త్యాగం కంటే ఉన్నతమైనది.
133. ఎలాంటి పరిస్థితుల్లోనైనా నీ గురువుతో సర్దుకుని ఉండటాన్ని అలవరుచుకో.
134. నీ గురువు ముందు అధికముగా మాట్లాడకు.
135. గురువు పట్ల శుద్ధమైన ప్రేమయే నిజమైన విధేయత.
136. ఉత్తమమైన వస్తువులను ముందుగా గురువుకు సమర్పించు.
137. శిష్యుడనేవాడు అహంకారము, అసూయ, ఓర్వలేనితనం నున్చి విముక్తుడై, ఎటువంటి బంధము లేకుండా, గురు భక్తి తత్పరుడై, అసహనం లేనివాడై, సత్యాన్ని తెలుసుకోవాలన్న తపన కలిగి ఉండాలి.
138. తన గురువు యందు శిష్యుడు దోషాలు/ తప్పులు వెతక రాదు.
139. తన గురువు ముందు శిష్యుడు ఎన్నడూ కూడా అనవసరమైన లేదా అక్కర్లేని మాటలు మాట్లాడకూడదు.
140. యజ్ఞ యాగాది క్రతువుల్లో అగ్ని మధించడానికి ఉపయోగించే ఆరణిలోని ముఖ్యమైన లేదా కింద భాగాన్ని గురువుగా, పై భాగాన్న్ని శిష్యునిగా భావించాలి. గురువు చేసే సూచన మధ్యలో ఉన్న ప్రదేశం. జ్ఞానం అనేది వారిద్దరినీ కలిపి ఉంచి ఆనందాన్ని తీసుకువస్తుంది.
141. గురువు నుంచి పొందిన శుద్ధమైన జ్ఞానము మాయ లేదా భ్రాంతి ని తొలగిస్తుంది.
142. ఎవరైతే గురువు అనుగ్రహం ద్వారా ఒక్కడే అయిన భగవంతుడు మాయ చేత అనేకమయ్యడని తెలుసుకుంటాడో, అతను వేదాలను అర్థం చేసుకొని, జ్ఞానాన్ని ఎఱుకపరచుకుంటాడు.
143. గురువు పట్ల సేవా మరియు పూజ్య భావం చేత ఏర్పడిన ఏకీకృతమైన భక్తి చేత సానబెట్టిన జ్ఞానమనే పదునైన ఖడ్గంతో మౌనముగా మరియు నిరంతరము సంసారమనే వృక్షాన్ని నరికి వేయవచ్చు.
144. గురువు అనే వాడు ఓడకు చుక్కాణి, భగవంతుని అనుగ్రహమనే గాలి దాన్ని ముందుకు తీసుకువెళుతుంది.
145. ఏ వ్యక్తి అయితే ప్రపంచము చేత విసిగిపోయి వైరాగ్యంతో నిండి ఉంటాడో, అతని గురువు చెప్పిన విషయాలను అతడు మనసులో మననం చేసుకోగలుగుతాడో, ధ్యానాన్ని నిరంతరం సాధన చేస్తాడొ, అతడి సాధన వలన ఏర్పడిన పుణ్యఫలం చేత అతని మనసు చెడును వదిలివేస్తుంది.
146. గురువు నుంచి సరైన పద్ధతిలో తెలుసుకుని మంత్రోపదేశం తీసుకుంటేనే, మంత్ర శుద్ధి ఏర్పడుతుంది.
147. అనాదిగా ఉండే అజ్ఞానములో చిక్కుకున్న మానవుడు గురువు లేకుండా ఆత్మసాక్షాత్కారం పొందలేడు. బ్రహ్మమును తెలుసుకున్నవాడు మాత్రమే బ్రహ్మజ్ఞానాన్ని ఇవ్వగలడు.
148. వివేకవంతుడైన మానవుడు గురువే భగవంతుడు మరియు ఆత్మ అని తెలుసుకొని నిరంతర భక్తితో గురువును పూజించాలి.
149. శిష్యునకు గురువు పట్ల మరియు భగవంతుని పట్ల నిజమైన భక్తి ఉండాలి.
150. శిష్యుడు గురువును విధేయతతో, జాగురూకతతో, నిజాయితీతో సేవించి, భాగవత్ధర్మాన్ని లేదా భగవంతుని యొక్క భక్తులైన వారి ధర్మాలను గురువు నుంచి తెలుసుకోవాలి.
151. శిష్యుడు గురువునే తన భగవంతునిగా సేవించాలి. అది మాత్రమే విశ్వాత్మకుడైన భగవంతునికి ప్రీతియై, ఆయన యొక్క అనుగ్రహానికి పాత్రులు అవడానికి నిశ్చయమైన మార్గము.
152 శిష్యుడు బంధరాహిత్యాన్ని సాధన చేస్తూ, తన సద్గురువు తో నిరంతర సంగం ఏర్పరుచుకోవాలి.

స్వామి శివానంద విరచిత గురుతత్వము - 29 వ భాగము

95. గురు-భక్తి యోగాన్ని పాటించడం చేత మాత్రమే వ్యక్తికి భయం తొలగి జీవితంలో అన్ని సందర్భాల్లోనూ ఆనందంగా ఉంటాడు.
96. గురు-భక్తి యోగాచరణ ద్వారా అమరమైన సచ్చిదానంద తత్వమైన ఆత్మను మీ లోనే తెలుసుకోండి.
97. మీ జీవితం యొక్క ఉద్దేశ్యము, లక్ష్యము మరియు ప్రయోజనంగా ఈ గురు భక్తి యోగాన్ని మార్చుకోండి. మీరు సచ్చిదానంద తత్వాన్ని చేరుకుంటారు.
98. గురు-భక్తి యోగం అనేది జ్ఞానానికి అనుబంధమైనది.
99. గురు-భక్తి యోగం యొక్క ముఖ్యమైన లక్ష్యం విచ్చలవిడిగా తిరిగే ఇంద్రియాలను నిగ్రహించి, చంచలమైన మనస్సును స్థిరముగా చేయుట.
100. గురు-భక్తి యోగం అనేది సనాతన హిందూ సంప్రదాయంలోని ప్రాచీన పద్ధతి. ఇది మానవుడిని సనాతనమైన ఆనందం మరియు భగవంతునితో ఐక్యము దిశగా తీసుకువెడుతుంది.
101. గురు-భక్తి యోగము అనేది ఆధ్యాత్మిక మరియు మానసిక అభివృద్ధికి చెందిన ఒక పద్ధతి/ వ్యవస్థ.
102. గురు-భక్తి యోగం అనేది మానవుడు సృష్టి యొక్క బంధనాల నుంచి విడిపించి, తన సహజ స్థితి అయిన దైవత్వానికి అతడిని చేరుస్తుంది.
103. గురుభక్తి యోగాచరణ శరీరాన్ని, మనస్సుని లోపాలు మరియు రోగాల నుంచి విముక్తి చేస్తుంది.
104. గురు-భక్తి యోగాచరణ ద్వారా వ్యక్తి భౌతికమైన మరియు మానసికమైన సమర్థతను, కార్యకుశలత పొందుతాడు.
105. గురు-భక్తి యోగం అనేది మానవుడిని బాధలు, కష్టాలు మరియు వృద్ధాప్యం విముక్తుడిని చేసి దీర్ఘాయువును మరియు ఎల్లప్పటికి ఉండే ఆనందాన్ని ప్రసాదిస్తుంది.
106. గురు-భక్తియోగము తనలో అన్ని రకాల భౌతిక మానసిక, ఆధ్యాత్మిక మరియు నైతికమైన క్రమశిక్షణ ఇముడ్చుకుని, తన మీద తనే విజయం సాధించి, ఆత్మసాక్షాత్కారానికి తోడ్పడుతుంది.
107. గురు-భక్తి యోగం అనేది మనస్సు యొక్క శక్తులు మీద నైపుణ్యాన్ని ఇచ్చే ఒకానొక శాస్త్రము మరియు కళ.
108. గురువును విశ్వాసం మరియు భక్తి అనే పుష్పాలతో పూజించండి.

స్వామి శివానంద విరచిత గురుతత్వము - 28 వ భాగము

75. గురు భక్తి యోగాన్ని ఆచరించడం వలన లెక్కకట్టలేనంత ఆనందం కలుగుతుంది.
76. గురు భక్తి యోగాన్ని ఆచరించడం చేత సాధకులకు దీర్ఘాయువు మరియు సచ్చిదానంద స్థితి లభిస్తుంది.
77. మనసు అనేది సంసారం యొక్క మూలం వద్ద ఉంది. మనస్సే బంధానికి మరియు మోక్షానికి, సుఖదుఃఖాలకు కారణము. ఈ మనసును కేవలం గురు-భక్తి యోగము యొక్క ఆచరణ ద్వారా నియంత్రించవచ్చు.
78. గురు-భక్తి యోగాన్ని ఆచరించడం చేత అమరత్వము, సచ్చిదానందస్థితి, స్వేచ్ఛ, పూర్ణత్వము, బ్రహ్మానందం మరియు ఎల్లప్పుడూ ఉండే సుఖము లభిస్తాయి.
79.అనంతమైన సుఖానికి దారి భక్తి యోగము యొక్క ఆచరణతోనే మొదలవుతుంది.
80. సన్యాసం, తపస్సు, ఇతర యోగాలు, దానధర్మాలు మరియు పుణ్యకార్యాలు మొదలైన వాటి చేత ఏదైతే లభిస్తుందో అది గురు భక్తి యోగాన్ని ఆచరించడం ద్వారా మరింత వేగంగా లభిస్తుంది.
81. అల్పమైన ప్రకృతిని జయంచి ఉన్నతమైన దివ్యానందాన్ని పొందడానికి ఈ గురు భక్తి యోగం అనేది ఒక ఖచ్చితమైన శాస్త్రము.
82. కొందరు వ్యక్తులు ఈ గురుసేవా యోగాన్ని అల్పమైన యోగంగా భావిస్తారు. వారు ఆధ్యాత్మిక రహస్యం అపార్థం చేసుకున్నారు.
83. గురు-భక్తి యోగము, గురుసేవా యోగము, గురు శరణ యోగము మొదలైనవన్ని పర్యాయపదాలు. అవన్నీ ఒకటే అర్ధాన్ని చూపిస్తాయి.
84. అన్ని యోగాల్లోకెల్లా గురు-భక్తి యోగమే రాజు.
85. సచ్చిదానంద తత్వాన్ని చేరుటకు ఈ గురు భక్తి యోగం అనేది సులభమైన, ఖచ్చితమైన, వేగవంతమైన, ఖర్చు లేనిది, మరియు నిరపాయకరమైన మార్గము. గురు భక్తి యోగం ద్వారా మీరంతా ఈ జన్మలోనే భగవంతుని చేరుగాక.
86. గురు-భక్తి యోగాన్ని స్వీకరించి కోల్పోయిన దివ్యత్వాన్ని తిరిగి పొందండి.
87. గురు-భక్తి యోగాన్ని ఆచరించి అద్వైతానికి మరియు బాధలకు అతీతమైన తత్వానికి వెళ్ళండి.
88. శిష్యునకు పరమ శాంతిని ఆనందాన్ని మరియు ముక్తిని ఈ గురు భక్తి యోగము తన ఆచరణ ద్వారా ప్రసాదిస్తుంది.
89. కౄరమైన పులిని, సింహాన్ని లేదా ఏనుగును పెంచుకోవడం చాలా సులభము. నీరు లేదా అగ్ని మీద నడవడం చాలా సులభము. కానీ ఒక వ్యక్తికి గురు భక్తి యోగాన్ని ఆచరించాలన్న తపన లేకుంటే సద్గురువు యొక్క పాదపద్మాలకు శరణాగతి చేయడం చాలా కష్టము.
90. గురు-భక్తి యోగము అనగా గురువు సేవ ద్వారా మనస్సును నియంత్రించుకోని, దానిని మార్చుకోవడం.
91. గురువుకు బేషరతుగా సంపూర్ణ శరణాగతి చేయడమే గురుభక్తిని పొందడానికి నిశ్చితమైన మార్గము.
92. గురువుయందు ప్రస్నాతీతమైన విశ్వాసమే గురు భక్తి యోగానికి పునాది లేదా ఆధారము.
93. నీవు నిజంగా భగవంతునికి పొందాలనుకుంటే ప్రాపంచికమైన ఇంద్రియ విషయాల నుంచి ప్రక్కకు మళ్ళి, గురుభక్తి యోగాని ఆచరించు.
94. ఎటువంటి ఆటంకమూ లేకుండా నిరంతరం గురు-భక్తి యోగాన్ని పాటించు.

స్వామి శివానంద విరచిత గురుతత్వము - 27 వ భాగము

44. ఈ జన్మలోనే అన్ని విధముల బాధలను తొలగించే ఏకైక పరిష్కారం గురు భక్తి యోగము.

45. అర్హత కలిగిన శిష్యునకు ఈ గురు భక్తి యోగ మార్గము త్వరగా ఫలాలను ఇస్తుంది.

46. గురు-భక్తి యోగము అహంకార నాశనముతో ముగిసి, సచ్చిదానందాన్ని అందిస్తుంది.

47. గురుభక్తి యోగము అత్యంత ఉన్నతమైన యోగము.

48. గురువు యొక్క పవిత్ర పాదాల ముందు సాష్టాంగ దండ ప్రణామాలు చేయుటకు సిగ్గు పడటం అనేది గురు-భక్తి యోగము యొక్క ఆచరణలో ఒక పెద్ద విఘ్నము/ అడ్డంకి.

49. తనను తాను సమర్ధించుకుంటూ, తన వద్దే అన్ని కలిగి ఉన్నాయి అనుకుంటూ; దురభిమానము; తనపై తనకు నియంత్రణ లేనితనము, తను చెప్పినదే వేదమని, తనకు తెలిసినదే నిజమే నమ్ముట, అలసత్వము, జడత్వము, మూర్ఖత్వం, మొండితనము, దోషములు వెతకడం, చెడు సహవాసం, నిజాయితీ రాహిత్యం, లౌల్యము, దురహంకారము, కోపము, దురాశ, పొగరు అనేవి ఈ గురు భక్తి యోగ మార్గంలో అతిపెద్ద అడ్డంకులు.

50. గురు భక్తి యోగము యొక్క నిరంతర ఆచరణ ద్వారా మనస్సు యొక్క చంచలత్వాన్ని నశింప చేసుకోండి.

51. గురు భక్తి యోగము యొక్క ఆచరణ ద్వారా చెదిరిపోయిన మానసిక కిరణాలు ఒకే దిశగా ఏకీకృతం అయి మీరు అద్భుతాలు చేయగలరు.

52. గురు-భక్తి యోగము అనే పథము గురువుకు సేవ చేయడం ద్వారా పవిత్ర హృదయాన్ని, ధ్యానము చేసి భగవత్ సాక్షాత్కారాన్ని పొందటానికి అత్యధిక ప్రాధాన్యతను ఇస్తుంది.

54. ముందు గురు భక్తి యోగము యొక్క తత్వాన్ని అర్థం చేసుకుని, ఆ తర్వాత దాన్ని ఆచరణలో పెట్టు. నీవు విజయం సాధిస్తావు.

55. దుర్గుణాలు అన్నింటిని నిర్మూలించడానికి అత్యంత ప్రభావవంతమైన మార్గము నిజాయితీగా గురు-భక్తి యోగాన్ని ఆచరణలో పెట్టుటయే.

56. గురు భక్తి యోగము అనే వృక్షానికి గురువుయందు అనన్యమైన విశ్వాసమే తల్లివేరు/మూలము.

57. ఎల్లప్పుడు గురువు యందు భక్తి పెరుగుతూ ఉండుట, వినయము, విధేయత మొదలైనవి ఈ చెట్టుకు కొమ్మలు. సేవ అనేది పుష్పము. గురువుకు శరణాగతి చేయుట అనేది అమరత్వాన్నిఇచ్చే ఫలము.

58. ఇది ఈ జన్మను ఉద్ధరించి రక్షించే సద్గురువు యొక్క పాదాల యందు అనన్యమైన విశ్వాసం మరియు భక్తి కలిగి ఉంటే నీవు ఈ గురు భక్తి యోగం లో విజయం పొందుతావు.

59. గురువుకు నిజమైన మరియు నిజాయితీతో కూడిన శరణాగతి గురు-భక్తియోగం యొక్క సారము.

60. గురు భక్తి యోగాన్ని ఆచరించడమంటే గురువు పట్ల అమితమైన ప్రేమ కలిగి ఉండుట.

61. నిజాయితీ లేకుండా గురు భక్తి యోగం లో ఏ విధమైన ఉన్నతి సాధ్యం కాదు.

62. నిశ్శబ్దంగా ఉండే ప్రదేశంలో ఉన్నతమైన ఆధ్యాత్మిక తరంగాలు గల ఒక మహా యోగి లేదా సమర్ధుడైన గురువు దగ్గర జీవించు. ఆయన వద్ద ఉంటూ గురువు భక్తియోగాన్ని ఆచరించు. అప్పుడు మాత్రమే భక్తియోగంలో విజయాన్ని సాధిస్తారు.

63. గురు-భక్తి యోగం లో ఘంటాపథంగా చెప్పే విషయం ఏమిటంటే బ్రహ్మనిష్ఠ-గురువు యొక్క పవిత్ర పాదపద్మాల యందు బేషరతుగా అనన్యమైన శరణాగతి చేయాలి.

64. గురు-భక్తి యోగ పద్ధతి ప్రకారం గురువు మరియు భగవంతుడు ఒక్కరే కనుక గురువుకు సంపూర్ణ శరణాగతి చేయటం అత్యవసరము.

65. గురువుకు శరణాగతి చేయుట అనేది గురు భక్తి యోగము అనే నిచ్చెనలో అత్యుత్తమమైన మెట్టు.

66. గురు భక్తి యోగ ఆచరణకు గురు సేవ చేయుట తప్పనిసరి.

67. గురువు యొక్క అనుగ్రహాన్ని పొందడమే గురు-భక్తి యోగము యొక్క లక్ష్యము.

68. మొండితనము లేదా మంకుతనం కలిగిన శిష్యుడు ఈ గురు భక్తి యోగ ఆచరణలో ఎటువంటి ఖచ్చితమైన ఉన్నతి పొందలేడు.

69. చెడు సాంగత్యము అనేది గురు-భక్తి యోగాన్ని ఆచరించే శిష్యునికి పెద్ద శత్రువు.

70. ఈ గురు భక్తి యోగాన్ని ఆచరించాలి అనుకుంటే సుఖవంతమైన/ పశుప్రాయమైన/ విష్యాసక్తితో కూడిన జీవనాన్ని వదిలిపెట్టు.

71. ఎవరైతే దరిద్రాన్ని వదిలించుకుని, ఆనందాన్ని, సుఖాన్ని పొందాలని అనుకుంటారో వారు ఖచ్చితంగా గురు-భక్తి యోగాన్ని శ్రధ్హ, నిజాయతీతో ఆచరించాలి.

72. గురు సేవా యోగాన్ని పాటించడం చేత నిజమైన మరియు ఎల్లప్పటికి ఉండే ఆనందం కలుగుతుంది, కానీ బాహ్యమైన నశించిపోయే వస్తువుల వలన కాదు.

73. ఎల్లప్పుడూ తిరిగే జనన మరణ చక్రాలు, సుఖదుఃఖాలు, సంతోషవిచారాల మనకు బయటపడే మార్గం లేదా? శిష్యుడా, విను, దీనికి ఒక ఖచ్చితమైన మార్గం ఉంది. నీ యొక్క మనసును ఇంద్రియ విషయాల నుంచి మళ్లించి, ద్వైతానికి అతీతముగా తీసుకువెళ్లే గురుసేవా యోగమందు నిలుపు.


74. ఎవడైతే గురుసేవా యోగాన్ని లేదా గురు భక్తి యోగాన్ని పాటించడం మొదలుపెడతాడో, అటువంటి సాధకునకు నిజమైన జీవనం మొదలై, ఇహలోకంలోనూ పరలోకంలోనూ అతనికి ఎల్లప్పటికి ఉండే ఆనందం కలుగుతుంది.

స్వామి శివానంద విరచిత గురుతత్వము - 26 వ భాగము

15. వినయంతో పూజనీయమైన సద్గురువు పాదాలను ఆశ్రయించు. జీవితాన్ని కాపాడే సద్గురువు పాదాలకు నమస్కరించు. సద్గురు పాద పద్మాలయందు రక్షణ పొందు. పవిత్రమైన సద్గురువు పాదాలను పూజించు. పవిత్రమైన సద్గురుని పాదాలను ధ్యానించు. మనలోని మాలిన్యాలను తొలగించి పవిత్రతను చేకూర్చే సద్గురువు పాదాల యందు విలువైన బహుమతులు అర్పించు. దివ్యమైన సద్గురుని పాదసేవకు జీవితాన్ని అంకితమివ్వు. సద్గురుని దివ్యమైన పాదపద్మాల ధూళిరెణుగువులుగా మారు. ఇదే గురు భక్తి యోగము యొక్క రహస్యము.

16. సద్గురుని పవిత్రమైన పాదపద్మాలకు శరణాగతి చేయటమే గురు-భక్తి యోగము యొక్క పునాది.

17. గురు-భక్తి యోగ పథంలో కావలసినదల్లా నిజాయతీ మరియు దోషరహితమైన ప్రయత్నము.

18. గురువు యందు భక్తి కలిగి ఉండుట గురు భక్తి యోగము యొక్క ఆచరణలో అత్యున్నతమైన అంశము.

19. గురువు యందు విశ్వాసము కలిగి ఉండుట గురు-భక్తియోగంలో మొదటి మెట్టు.

20. శాస్త్రాల ఎందుకు నిష్ణాతుడైన బ్రహ్మ-నిష్ఠా గురువు యందు మనసా, వాచా, కర్మణా పూర్తి విశ్వాసము లేదా గుడ్డు విశ్వాసముతో ఉండుటయే గురు-భక్తి యోగము యొక్క సారము.

21. ఈ యుగంలో ఆచరించడానికి అత్యంత సులువైన మరియు ఉత్కృష్టమైన యోగమే ఈ గురు భక్తి యోగము.

22. గురుభక్తి యోగంలోని ఉన్నతమైన సూత్రం ఏమిటంటే గురువును భగవంతునిగా భావించాలి.

23. ఈ గురు-భక్తి యోగం యొక్క తత్వంలోని ఆచరణాత్మకమైన విషయం ఏమిటంటే తన ఇష్ట దేవతయే తన గురువని గుర్తెఱగాలి.

24. గురు-భక్తి యోగమనే ఈ పద్ధతి కళాశాలలో లేదా ఉపన్యాసాల ద్వారా కానీ బోధించబడేది, నేర్పబడేది కాదు. శిష్యుడు గురువు దగ్గర ఎన్నో సంవత్సరాలు జీవించి, తీవ్రమైన తపస్సు, క్రమశిక్షణ, బ్రహ్మచర్యం మరియు ధ్యానంతో కూడిన జీవనాన్ని గడపాలి.

25. గురు భక్తి యోగం అనేది అన్ని శాస్త్రాలకు మూలమైన శాస్త్రము.
26. గురు భక్తి యోగము అమరత్వాన్ని, అవధులు లేని ఆనందాన్ని, స్వేచ్ఛను, పూర్ణత్వాన్ని, సచ్చిదానంద స్థితిని, తరిగిపోని శాంతిని ప్రసాదిస్తుంది.

27. భక్తి యోగము యొక్క ఆచరణ ద్వారా బంధరాహిత్యము మరియు వైరాగ్యము ఏర్పడి కైవల్యము లేదా మోక్షము లభిస్తాయి.

28. గురు భక్తి యోగాన్ని ఆచరించడం వలన శిష్యుని యొక్క మనోభావాలు మరియు కామోద్రేకం నియంత్రించబడతాయి, అతడు బయట ప్రకృతి యొక్క ప్రలోభాలను తట్టుకొని, మనసును క్షోభ పెట్టే విషయాలను నిర్మించగలుగుతాడు మరియు అజ్ఞానాంధకారం యొక్క ఆవలి ఒడ్డుకు చేరడానికి గురువు యొక్క అనుగ్రహాన్ని పొందే పాత్రతను ఇస్తుంది.

29. గురువు-భక్తి యోగం యొక్క ఆచరణ వల్ల అమరత్వము, ఉన్నతమైన శాంతి మరియు ఎడతెగని ఆనందము లభిస్తాయి.

30. గురు-భక్తి యోగము యొక్క ఆచరణ వలన భయం, అజ్ఞానం, చెడు ఆలోచనలు, మనస్సు యొక్క గందరగోళం, రోగము, ఆందోళన నిరాశ మొదలైనవి నిర్మూలించబడతాయి.

31. గురు-భక్తి యోగం అనేది వ్యక్తిగతమైన అహంకారము, భావాలు, సంకల్పాలు, అవగాహనస్థాయి, అనంతత్తవ్వానికి దగ్గరగా మార్చుతుంది.

32. గురు-భక్తి యోగంలో చెప్పబడిన సాధనలు చాలా సులువుగా ఉంటాయి మరియు నిర్భయత్వం అనే అవతలి ఒడ్డుకు ఖచ్చితంగా చేరుస్తాయి.

33. గురు-భక్తి యోగము గురువు యొక్క అనుగ్రహం పొందడానికి పాటించే ఒక గట్టి క్రమశిక్షణతో కూడిన పద్ధతి.

34. ఎటువంటి ఫలాపేక్ష లేకుండా గురువుకు సేవ చేయడము మరియు గురువు యొక్క పాదపద్మాల యందు భక్తి పెరుగుతూ ఉండడం అనేది గురు భక్తి యోగం నేతత్వంలోని అంతర్గతమైన సాధన.

35. నైతికమైన క్రమశిక్షణ మరియు గురువు యందు భక్తి మొదలైనవి లేని వ్యక్తి గురు భక్తి యోగాన్ని పాటించినప్పటికీ గురువు యొక్క అనుగ్రహాన్ని పొందలేడు.

36. గురుభక్తి యోగమే కర్మ యోగము, భక్తి యోగము, రాజయోగము, హఠయోగము మొదలైన ఇతర అన్ని యోగాలకు పునాది.

37. ఎవరైతే గురు భక్తి యోగ పథం నుంచి తప్పుకున్నాడో, అతడు మరింత అజ్ఞానంలోకి, మరింత అంధకారంలోకి మరియు మరణానికి వెళుతున్నాడు.

38. గురు భక్తి యోగాన్ని ఆచరించడం వలన జీవితం యొక్క పరమ లక్ష్యమైన ఆత్మసాక్షాత్కారానికి స్పష్టమైన నిశ్చితమైన మార్గం ఏర్పడుతుంది.

39. గురు భక్తి యోగము అందరూ ఆచరించవచ్చు. మహాత్ములందరూ, మహా మేధావులందరూ గురు భక్తి యోగాచరణ ద్వారా ఎంతో గొప్ప కార్యాలను ఒనరించారు.

40. గురు భక్తి యోగంలో యోగాలను మిళితమై ఉన్నాయి. గురు భక్తి యోగాన్ని స్వీకరించని/ ఆచరించని వ్యక్తి మరింత కఠినమైన ఇతర ఏ యోగాలు పాటించే లేడు.

41. ఆచారోపాసన ద్వారా గురు కృపను పొందడానికి గురు భక్తి యోగము అనే ఈ పద్ధతి అత్యధిక ప్రాముఖ్యతనిస్తుంది.

42. వేదాలు మరియు ఉపనిషత్తులు ప్రాచీనమైనది ఈ గురు భక్తి యోగము.


43. జీవితంలోని అన్ని బాధలను మరియు చుక్కలను తుడిపివేసే మార్గాన్ని బోధిస్తుంది గురుభక్తి యోగము.

స్వామి శివానంద విరచిత గురుతత్వము - 25 వ భాగము

తొమ్మిదవ అధ్యాయము
గురు భక్తి యోగము

ఎలాగైతే కీర్తన మరియు సాధన అతి శీఘ్రంగా భగవంతుని దర్శనం పొందడానికి కలియుగంలో చేయగలిగిన ప్రత్యేకమైన సాధనలో, అలాగే సందేహాలు, నాస్తికత్వము, అహంకారము, పొగరుతో నిండిన ఈ యుగానికి అత్యంత ముఖ్యమైన శ్రేష్టమైన సాధన, ఒక సరికొత్త యోగము మీ ముందు ఉంచుతున్నాను. అదే గురు భక్తి యోగము. ఇది అత్యద్భుతమైనది. దాని యొక్క శక్తి మహత్తరమైనది. దాని యొక్క ప్రయోజనము ఏనాడు నిష్ఫలం అవ్వదు. గురు భక్తి యోగము యొక్క నిజమైన వైభవం వివరించలేము. ఈ యుగంలో ఈ జన్మలోనే భగవంతుడు రక్తమాంసాలతో కూడిన శరీరంతో మీ ముందు దర్శనం ఇచ్చేలా చేయగలుగే శ్రేష్ఠమైన యోగమిది. కఠినమైన రాజసిక అహంకారమే సాధకునకు ఒక పెద్ద శత్రువు. మదము మరియు దుష్టమైన అహంకారాన్ని నాశనం చేయుటకు గురుభక్తి యోగం అనేది నిశ్చ్యమైన మరియు ఉన్నతమైన సాధన. ఎలాగైతే ఒక ప్రత్యేకమైన రసాయనం ద్వారా మరణాంతకమైన క్రిమి యొక్క సమాహారం జరుగుతుందో, అలాగే అవిద్యను మరియు అహంకారాన్ని నాశనం చేయడంలో ఈ గురుభక్తి యోగం అనేది అసమానమైనది. అహంకారము మరియు మాయ అనేవి భయంకరమైనవి. ఏ వ్యక్తి అయితే గురు భక్తి యోగము ద్వారా తనను తాను తడిపి ముద్ద చేసుకుంటాడు, అతడు అత్యంత అదృష్టవంతమైన జీవుడు మరియు అతడు ఇక ఎంతకాలము మాయ మరియు అహంకారము వలన పీడింపబడదు. అతనిలో ఆ లక్షణాలు పూర్తిగా శక్తిహీనం అవుతాయి. అతి త్వరగా ఈ యోగం లోకి ప్రవేశించిన వాడు అతి త్వరగా దీవించబడ్డవాడూ. ఎందుకంటే అతడు ఇతర అన్ని యోగాలో కూడా తిరుగులేని విజయాన్ని సాధిస్తాడు. అతనికి కర్మ, భక్తి, ధ్యాన మరియు జ్ఞాన యోగాల యొక్క సంపూర్ణమైన ఫలితాలు ప్రత్యేకంగా అందుతాయి.

ఈ యోగాన్ని ఆచరించడానికి కావల్సినవి నిజాయతీ, విశ్వాసము మరియు విధేయత అనే ఈ మూడు గుణాలు. పరిపూర్ణతను పొందాలని మీ యొక్క ఆకాంక్షలో నిజాయితీగా ఉండండి. అనిశ్చితితో, అస్పష్టతతో ఉండకండి. మీరు గురువుగా అంగీకరించిన వ్యక్తి మీద పూర్తి విశ్వాసం కలిగి ఉండండి. ఏ కొద్దిగా కూడా సందేహానికి తావు/అవకాశం ఇవ్వకండి. ఒకసారి నీవు గురువుగా ఎంచుకున్న వ్యక్తి యందు పూర్తి విశ్వాసాన్ని ఉంచినప్పుడు, ఆయన ఏది చెప్పినా అది నీ మేలు కొరకేనని తెలుసుకో. కనుక ఆయన యొక్క బోధనలను తప్పకుండా పాటించు. చెప్పినది చెప్పినట్టు ఆచరించు. ఈ విధంగా చేస్తే నా మాటగా చెబుతున్నాను: మీకు పరిపూర్ణత లభిస్తుంది; గట్టిగా హామీ ఇస్తున్నా.

నీకు ఇప్పుడు గురు భక్తి యోగములోని ముఖ్యమైన వివరాలు ప్రతిపాదిస్తున్నాను.
1. గురు భక్తి యోగము అనేది సద్గురువు యందు సంపూర్ణమైన శరణాగతి చేయుట.
2.ఈ గురు భక్తి యోగానికి ఎనిమిది అంగాలు ఉన్నాయి. ముఖ్యమైనవి ఇవి. (అ) గురు భక్తి యోగాన్ని ఆచరించాలని నిజమైన ఆకాంక్ష కలిగి ఉండుట. (ఆ) సద్గురువు యొక్క ఆలోచనలు, మాటలు మరియు కర్మలయందు సంపూర్ణ విశ్వాసము. (ఇ) గురువుకు వినయంతో సాష్టాంగ నమస్కారము చేయుట మరియు గురు నామాని మననం చేయుట (ఈ) గురువు యొక్క ఆదేశాలను పాటించడంలో పూర్తి విధేయత, ఆజ్ఞాపాలన కలిగి ఉండుట. (ఉ) ఏ విధమైన ఫలితాలు ఆశించకుండా సద్గురువులకు వ్యక్తిగత సేవ చేయుట (ఊ) భావము మరియు భక్తితో సద్గురువు యొక్క పాదపద్మాలను ప్రతిరోజు ఆరాధించుట (ఋ) సద్గురువు యొక్క లక్ష్యం కొరకు తన (శరీరం), మన (మనస్సును), ధనా(ధనము) లను అర్పించుట లేదా శరణాగతి చేయుట (ౠ) దయాళువైన గురువు యొక్క అనుగ్రహం కోసం ఆయన యొక్క పవిత్ర పాదాలను ధ్యానం చేయుట మరియు ఆయన యొక్క పవిత్రమైన ఉపదేశాలను విని ఆచరించుట.
3. గురుభక్తి యోగమనేది ఒక యోగము.
4. గురుభక్తి యోగాన్ని పాటించకుండా సాధకుడు భగవంతునిలో లీనమయ్యే ఆధ్యాత్మిక మార్గంలోకి ప్రవేశించలేడు.
5. గురు భక్తి యోగ తత్త్వాన్ని అర్ధం చేసుకున్నవాడు మత్రమే తన గురువుకు బేషరుతుగా శరణాగతి చేయగలడు.
6. గురు భక్తి యోగాన్ని ఆచరించడం స్వారా జీవితం యొక్క అత్యున్నత లక్ష్యమైన ఆత్మసాక్షాత్కారాన్ని సాధించవచ్చు.
7. గురు భక్తి యోగం అనేది ఎలాంటి భయం లేకుండా ఆచరించగలిగిన నిజమైన సురక్షితమైన యోగము.
8. గురువు యొక్క ఆజ్ఞలను పూర్తి విధేయతతో స్వీకరించి, ఆయన బోధలకు అనుగుణంగా జీవితాన్ని మలుచుకోవడంలోనే గురు భక్తి యోగం యొక్క సారం ఉంది.
9. గురు భక్తి యోగం యొక్క లక్ష్యము గురువుకు సంపూర్ణ శరణాగతి ద్వారా మానవుడిని దేహం యొక్క బంధనాల నుంచి మరియు ప్రకృతి యొక్క సంకెళ్ళ నుంచి విడగొట్టి, అతని యొక్క శుద్ధమైన సచ్చిదానంద తత్త్వాన్ని తెలుసుకునేలా చేయడం.
10. గురుభక్తి యోగాన్ని ఆచరించే వ్యక్తి, ఏ కష్టం లేకుండా అహంకారాన్ని నిర్మూలించుకుని, సంసార సాగరాన్ని దాటగలడు.
11. గురు భక్తి యోగాన్ని పాటించేవానికి ఈ యోగం అమరత్వాన్ని మరియు బ్రహ్మానందాన్ని ఇస్తుంది.
12. గురుభక్తి యోగం మానసిక స్థిరత్వాన్ని మరియు ప్రశాంతతను ఇస్తుంది.
13. పరమానందాన్ని అనుభవించడానికి గురుభక్తి యోగమే కీలకమైనది.
14. జీవితం యొక్క లక్ష్యం గురు-భక్తి యోగం ద్వారా సద్గురువు యొక్క శుభప్రదమైన అనుగ్రహాన్ని పొందడం.

స్వామి శివానంద విరచిత గురుతత్వము - 24 వ భాగము

ఇది సత్సంగమా?

ఈనాడు పతనమయ్యింది. అది ఒక రకమైన మానసిక కాలక్షేపము గా మారిపోయింది. సాయంకాల సమయంలో ఒక గంట పాటు సన్యాసులు మరియు గృహస్థులు వేదాంత చర్చ పేరున కొన్ని కబుర్లు, గాలి మాటలు, రాజకీయాలు, దుష్ప్రచారాలు, చాడీలు, ముసి ముసి నవ్వులు, కొంత ఇకిలింపులు-సకిలింపులు మరియు పనికిమాలిన భావలతో కూడిన పిచ్చి ప్రేలాపనలు చెప్పుకోవడం అనేది సత్సంగం పేరున జరుపుతున్నారు. సత్సంగం చేసే సన్యాసుల మనస్సులు మరియు దాన్ని వినే ఇతరులు మనస్సులు, ఎన్నో ఏళ్ల సత్సంగం తర్వాత కూడా అదే స్థితిలో ఉంటున్నాయి. వారిలో ఏ విధమైన ఉన్నతి మరియు ఆధ్యాత్మిక ఎదుగుదల లేదు.

ఈ ప్రపంచంలో సాధువులు, సన్యాసులు చరిస్తున్నప్పుడు, గృహస్థులకు వైరాగ్య జీవనానికి ఉదాహరణలుగా నిలవాలి. వారు కేవలం వారి జీవనానికి సరిపడా వస్తువులు మాత్రమే గృహస్థుల నుంచి తెచ్చుకోవాలి. వారితో వీరు స్వేచ్ఛగా కలువకూడదు. గ్రామానికి బయట ఒక ఏకాంతప్రదేశంలో జీవించాలి. ఆధ్యాత్మిక శిక్షణా తరగతులను శ్రద్ధగా నిర్వహించాలి. భౌతికమైన విషయాలు మాట్లాడకూడదు. ఎక్కువగా నవ్వు తెప్పించే కథలను వారు చెప్పకూడదు. ఎగతాళి చేసే/ పరిహాసానికి గురి చేసే సంఘటనలు చెప్పకూడదు. అక్కడ పవిత్రమైన ప్రశాంతత ఉండాలి. మొత్తం ప్రేక్షకులు మంత్రముగ్ధలవ్వాలి. అక్కడ పూర్తిగా నిశ్శబ్దం ఉండాలి. అప్పుడు మాత్రమే గృహస్థులు ప్రభావితమవుతారు. వారికి సత్సంగం నుంచి ఇంకేదో వస్తోందని భావిస్తారు.

ఖీర్- పరోటా పక్షులు

గృహస్థుల నుంచి సన్యాసి ఎన్నో వస్తువులను పదే పదే అడిగిన మరుక్షణం నుంచి అతను తన గౌరవాన్ని, ప్రభావాన్ని కోల్పోతాడు. అతడు ఆ ప్రదేశాన్ని వెంటనే వదిలి వెళ్ళవలసి వస్తుంది. కొందరు సిగ్గులేని సన్యాసులు గృహస్థుల ఇంట్లో నెలల తరబడి ఉంటారు. వారు ఖీర్- పరోటా పక్షులు. వారు నిజమైన సన్యాసులు కాదు. రాబోయే జనాభా లెక్కల్లో అధికారులు వారి నివేదికను పంపడంలో చాలా జాగ్రత్తగా ఉండాలి. ఈ వ్యక్తులు సాధువులు మరియు సన్యాసుల కోవలోకి రారు. మేక తోలు కప్పుకున్న తోడేలు వలె కాషాయం కట్టుకున్నా నిపుణులైన ముష్టి వారు వీళ్ళు. నిజమైన సన్యాసి యొక్క నడవడిక ఎంతో వాస్తవికంగా ఉంటుంది. అధికంగా సాధువులు పెరగడం వలన మరియు 74 లక్షల మంది సాధువులు ఉండటం వలన ప్రయోజనమేమి? అందులో మంచి సంప్రదాయం కలిగి ఈ దేశానికి మరియు తమకు ఉపయోగపడే సన్యాసులు, రెండు వేలకు మించి ఉండరు. నిజమైన సాధువు లేదా సన్యాసి ప్రకాశవంతమైన సూర్యుని వలె ఉంటాడు. అతడు రేయింబవళ్లు ప్రకాశిస్తూ ఉంటాడు.

సాధకులకు శిక్షణ ఇవ్వడం

సాధువులు మరియు సన్యాసులకు రిషికేశ్ మాత్రమే అత్యుత్తమమైన ప్రదేశము. ఉచిత ఆహారము, ఉచిత కుటీరాలు మరియు ఉచిత ఆశ్రమాలు అందుబాటులో ఉన్నాయి. అందమైన గ్రంధాలయం ఉంది. వైద్య సదుపాయం కూడా ఉంది. మీరు ఒక పక్షి వలె స్వేచ్ఛగా ఉండవచ్చు. నిజంగా ఆధ్యాత్మిక ఉన్నతి మరియు ఆత్మసాక్షాత్కారం పొందగోరే సాధువు లేదా సన్యాసి లేదా సాధకుడు, ఈ ప్రదేశంలోనే ఉంటూ ఒక్క రోజు కూడా ఊరు దాటకుండా కనీసం 12 ఏళ్లు ఉంటూ తీవ్రమైన నిరంతర సాధన చేయాలి. ప్రదేశం యొక్క మార్పు అవసరం లేదు. గంగా మరియు హిమాలయాలు ఎల్లవేళలా ప్రేరణను, ఉన్నతిని మరియు ఆరోగ్యాన్ని ఇచ్చేవిగా ఉంటాయి. ఇక్కడ నుంచి వేరొక చోటికి మారాలనుకోవడం బలహీన సంకల్పలు, పిచ్చి పట్టిన వైద్యులు మరియు యొక్క ధనికుల యొక్క మూర్ఖమైన ఆలోచన మాత్రమే.

ఒక చోటి నుంచి వేరొక చోటికి మారుతూ అనేక వేదికల మీద ప్రవచనాలు చెప్పే సన్యాసి కంటే, తన ఆశ్రమంలోనే కూర్చున్న సాధువు లేదా సన్యాసి మరింత దృఢమైన, ఘనమైన కార్యాన్ని సమర్థవంతంగా నిర్వర్తిస్తాడు. ఒక పువ్వు పుష్పించగానే అది తేనెటీగలకు ఏ విధమైన ఆహ్వానాన్ని పంపనవసరం లేదు. తేనెటీగలు వాటంతట అవే వస్తాయి. సత్యం కోసం తపించే నిజమైన సాధకులు నిజమైన సన్యాసి యొక్క ఆశ్రమం ద్వారం ఉంది వెళ్లి నిలబడతారు. సన్యాసులు అనేకచోట్ల ప్రచారం చేసుకోవలసిన అవసరం లేదు. ఆధ్యాత్మిక వేదికల మీద ప్రవచనాల అరగంటలో జరిగేది తాత్కాలికమైన ఉద్దీపనం మాత్రమే. అక్కడ పన్ని మూలల్లో కొంత అల్లరి, గొడవలు, తగువులాలు, చప్పట్లు, 'విను విను' అనే శబ్దాలు ఉంటాయి. నిజమైన అధికారులు (అర్హత కలిగిన సాధకులు/ భక్తులు) మాత్రమే సన్యాసులను కలవడానికి వారి ఆశ్రమానికి వెళతారు. ఇటువంటి సాధకుల యొక్క హృదయాలు సన్యాసులు ఇచ్చే ఉపదేశాలతో ప్రభావితమవుతాయి. సాధకులను తర్ఫీదు/ శిక్షణ ఇవ్వడమే సన్యాసులు చేయగలిగిన అతి గొప్ప సేవ. ప్రతి సాధకుడు ఒక ఆధ్యాత్మిక కేంద్రంగా లేదా శాంతి, జ్ఞానము మైర్యు ఆనందాన్ని పంచడానికి వీలయ్యే ఒక వాహకంగా మారుతాడు. సన్యాసులు తిరిగినప్పుడు అతని సమయం వృధా అవుతుంది. అన్ని రకాల వ్యక్తులు ఈ రోజుల్లో సన్యాసులను ఉత్సుకతతో కలవాడానికి వస్తారు. సన్యాసుల యొక్క అవసరాలను గృహస్థులు ఈనాడు తీర్చడంలేదు. వారు పూర్తిగా స్వర్ధపరులు అయ్యారు. వారు కేవలం నోటి మాటగా జాలి చూపెడతారు; "స్వామీజీ మహారాజ్! ఏమైనా సేవ చేయాల్సింది ఉంటే చెప్పండి". ఇది పూర్తిగా మోసము, కపటత్వం మరియు మాయ.

కాషాయం ధరించిన వ్యక్తి ఒక గొప్ప ఉన్నతమైన జీవితంలోకి ప్రవేశిస్తున్నాడని మరియు తన మీద గొప్ప బాధ్యత ఉందని, అతను త్వరలోనే ఈ ప్రపంచానికి ఒక ధార్మికమైన మరియు ఆధ్యాత్మిక గురువుగా మారుతున్నాడని అతను ఎల్లప్పుడూ గుర్తు పెట్టుకోవాలి. అతడు సద్గుణాలు, దైవీ గుణాలు మరియు వైరాగ్యం, పవిత్రతతో కూడిన ఆదర్శవంతమైన జీవితం గడపడానికి తన వంతు ప్రయత్నం పూర్తిగా చేయాలి.

నిజమైన సన్యాసులు ఈ ప్రపంచానికి వెలుగు చూపేవారు మరియు లాంతర వంటివారు. దూరంగా సముద్రంలో ఉన్న నావలకు దీపగృహము (లైట్ హౌస్) ఏ విధంగానైతే వెలుగును పంపుతుందో, అలాగే సన్యాసులు సైతం అజ్ఞానాంధకారంలో మునిగి ఉన్న దూరదేశ ప్రజలకు వారి యొక్క దివ్యమైన కాంతి ప్రసరించాలి. వారు ప్రపంచాన్ని కదిలించగలరు.

సమస్తాన్ని త్యాజించి, సత్య మార్గంలో నడుస్తున్న నిజమైన సన్యాసులకు మంగళమగుగాక! తన స్వస్వరూపంలో, బ్రహ్మ నిష్ఠలో ఉండే సన్యాసులకు అభివందనాలు! పరివ్రాజకాచార్యలు, బ్రహ్మ విద్యా గురువులు ఎవరైతే ఆత్మజ్ఞానాన్ని దశదిశలా వ్యాపింప చేస్తున్నారో, వారికి మంగళమగుగాక! వారందరి దీవెనలు మనపై ఉండుగాక!

ఎనిమిదవ అధ్యాయము సమాప్తము

స్వామి శివానంద విరచిత గురుతత్వము - 23 వ భాగము

ఎనిమిదవ అధ్యాయము
సన్యాసులతో సంభాషణ

ఆపాతవైరాగ్యవతో ముముక్షూన్
భవాబ్ధిపారం ప్రతియాతుముద్యతాన్ ।
ఆశాగ్రహో మజ్జయతేఽన్తరాలే
నిగృహ్య కణ్ఠే వినివర్త్య వేగాత్ ॥

కేవలం వైరాగ్యం మాత్రమే కలిగి ఉండి, సంసార సాగరాన్ని దాటగోరే ముముక్షువులు, వారు కాంక్ష లేదా కోరిక అనేది తిమింగళం చేత పట్టుకోబడుతున్నారు. మరియు అది వారి మెడ పట్టుకొని బలవంతంగా మధ్యలోకి లాగి వారిని ముంచేస్తోంది.
వివేకచూడామణి

హరిః ఓం! బ్రహ్మమునకు నమస్కారములు! శ్రీ శంకరాచార్యులకు, మహాపురుషులకు మరియు సన్యాసులకు వందనాలు! దేహ అధ్యాస్యము (శరీర భావనను) స్వార్ధాన్ని, వాసనలను, అహంకారాన్ని, అభిమానాన్ని న్యాసము అనగా త్యజించినవాడే సన్యాసి. బ్రహ్మ యొక్క నలుగురు కుమారులైన సనక, సనందన, సనత్కుమార ,సనత్సుజాతులు, దత్తాత్రేయులవారు, మరియు శ్రీ ఆది శంకరాచార్యులు నివృత్తి మార్గంలో అగ్రగణ్యులు, పథనిర్ణేతలు. ఈ సన్యాస ఆశ్రమానికి వారు మూల పురుషులు.

ఈ కాలపు ధోరణి

ఈ ప్రపంచానికి ఆర్థిక, సామాజిక, రాజకీయ, జాతీయ, మానసిక మరియు అలాగే ఆధ్యాత్మికతను ఉన్నతి కావాలి. ఆధ్యాత్మికతను ఏనాడు విస్మరించరాదు. అదే మూలము. అది ఉంటే అన్నీ ఉన్నట్టే. ఈ రోజులలో కర్మయోగాన్ని ఆచరించే నేతలు కేవలం కర్మ మీద మాత్రమే తమ దృష్టిని నిలుపుతున్నారు. ఆధ్యాత్మిక జీవనాన్ని వారు పూర్తిగా విస్మరిస్తున్నారు. ఎన్నో మఠాలకు చెందిన సన్యాసులు కూడా కేవలం సామాజిక సేవలోనే ఉన్నారు. కొందరు సన్యాసులకు పాడిత్యం ఉంది మరియు వారు కొంత కాలం గౌరవాన్ని పొందుతారు. వారు కూడా ధ్యాన పరమైన జీవితాన్ని అవతల పడవేసారు. జనుల మనసులో వారు నిజమైన మరియు దీర్ఘకాలం ఉండగలిగిన ప్రభావాలను చూపలేకపోతున్నారు, ఎందుకంటే నిజమైన ఆధ్యాత్మిక శక్తి లేదా ఆంతరంగికమైన ఆత్మశక్తి అనేదు వారి వద్ద లేదు.

ఆధ్యాత్మికవేత్తలు, యోగులు, జ్ఞానులు మరియు సన్యాసులు తోకచుక్క వలె లేదా కార్తీకమాసంలో వచ్చే విదియ నాటి చంద్రునివలె బయట కనిపించి, వారి యొక్క శక్తిని జనులకు ధారపోసి, గొప్ప కార్యాలకు శ్రీకారం చుట్టి, ఆ క్షేత్రం నుంచి మాయం అవ్వాలి. ఆశ్రమాల్లో చాలాకాలం పాటు ఆధ్యాత్మిక శిక్షణ తరగతులు నిర్వహించడం మరియు ఆశ్రమాలు స్థాపించడం అనేది చిన్న సన్యాసులు చేయాలి. ఇది ఉగ్రమైన, అగ్ని వంటి గొప్ప ఆధ్యాత్మికవేత్తల స్వభావానికి సరిపోదు. గంగా కేవలం ఏడాదిలోనే నాలుగు నెలల్లోనే ముంచెత్తినట్టుగా, వారు ఈ భూమిని ఆధ్యాత్మిక జ్ఞానం లేదా దివ్య జ్ఞానంతో ముంచెత్తుతారు.

సౌకర్యవంతమైన జీవనం యొక్క ఆకర్షణ

సన్యాసి లేదా గృహథు కూడా తన యొక్క సౌకర్యవంతమైన జీవనం కోసం ఆశ్రమాన్ని స్థాపించకూడదు. ఆశ్రమాన్ని స్థాపించిన సమయంలో ఎందరో సన్యాసులు చాలా పవిత్రంగా ఉండేవారు, అంటే నా అర్ధంలో వారు పేదవారిగా ఉన్నారు. ఒక్కసారి వారు ధనికులవ్వగానే, వారిని పొగిడేవారు, కీర్తించేవారు మరియు భక్తులు సరిపడినంత మంది దొరకగానే, నిస్వార్థ సేవ అనే ఆలోచన వెళ్ళిపోతుంది, స్వార్ధ ఆలోచనలు అనేవాటికి హృదయాల్లో చోటు లభిస్తుంది. వారు ఏ ఉద్దేశంతో ఆశ్రమాన్ని స్థాపించారో అది విచ్చిన్నం, నిష్ఫలం అవుతుంది. అప్పుడది కేవలం ధనాన్ని సంపాదించి పెట్టే వ్యవస్థగా మారుతుంది. జనులకు దాని పట్ల ఆకర్షణ ఉండదు. ఒక వ్యవస్థకు అధిపతి అయిన వ్యక్తి వైరాగ్యంతో కూడిన జీవనం గడుపుతూ, పూర్తిగా అన్నింటినీ త్యజించి ఉంటే అటువంటి ఆశ్రమం ఈ భూ ప్రపంచంలోనే శాంతికి, ఆనందానికి, సంతోషానికి కేంద్రబిందువు మరియు వేదిక అవుతుంది. అది కొన్ని లక్షల మంది జనులను ఆకర్షిస్తుంది. ఈ ప్రపంచానికి అటువంటి గొప్ప ఆధ్యాత్మిక వేత్తలు అధిపతులుగా గల అటువంటి ఆశ్రమాల అవసరం ఉంది.

కొందరు యువ సన్యాసులు ముష్టి కాయను గింజలు స్వీకరిస్తారు. రెండు సంవత్సరాల్లో 120 విత్తనాలను మింగుతారు. సిద్ధాంత కౌముది మరియు న్యాయ శాస్త్రాన్ని మూడు సంవత్సరాలు అభ్యసిస్తారు. వారు నిజమైన సిద్ధులు అని భావిస్తారు మరియు ప్రాపంచిక మనసు కలిగిన వ్యక్తులతో స్వేచ్ఛగా కలుస్తారు/ విహరిస్తారు. ఇది ఎంతో తప్పు. ముష్టి కాయ లేదా ముషిణి చెట్టు గింజ నంపుస్కత్వాన్ని కలిగిస్తుంది. నపుంసకత్వం బ్రహ్మచర్యం కాదు. వారు త్వరగా పతనం అవుతారు. ఇది ప్రత్య్కేమగా చెప్పక్కర్లేదు. పెద్ద పెద్ద, మహా జ్ఞానులు మరియు గొప్ప యోగులు కూడా చాలా జాగ్రత్తగా ఉండాలి. వారు విచక్షణారహితంగా, ఇష్టం వచ్చినట్లుగా భౌతిక ఆలోచనలు కలిగిన వ్యక్తులతో కలువకూడదు. రెండు చేపల మధ్య జరుతున్న కామకలపం అది చూసిన ఒక గొప్ప ఋషి మనస్సును ఉద్రేకపరచింది. స్త్రీ యొక్క గాజుల సవ్వడిలేదా అంచు కలిగిన మరియు రంగు రంగుల వస్త్రాలు సైతం మనస్సులో తీవ్రమైన ఉద్రేకాన్ని మనసులో కలిగిస్తాయి. వాటికి వాటి యొక్క సొంతమైన అపవిత్ర సాంగత్యం ఉంటుంది. కామం అనేది చాలా శక్తివంతమైనది. మాయ నిదూఢమైనది. కనుక ఓ సాధకులారా! జాగ్రత్త పడండి!

క్రమశిక్షణారహితులైన యువ సాధకులు, బ్రహ్మచారులు మరియు సన్యాసులు గృహస్థుల వద్ద సత్సంగం నిర్వహిస్తున్నామనే అనే ముసుగులో, వారి దగ్గరకు వెళ్ళడాంకి కారణం నాలుక మరియు రసేంద్రియం. ఓ సాధకులారా! కేవలం రన్సేంద్రియాన్ని సంతృప్తి పరచడానికి తల్లిదండ్రులను వదిలిపెట్టి, మీ ఆస్తులను సామాజిక హోదాను త్యజించి, సన్యాసం స్వీకరించారా? లేదా ఆత్మ సాక్షాత్కారం కోసం స్వీకరించారా? అది ఒకవేళ మీ రసేంద్రియాన్ని సంతృప్తిపరచడం కోసమే అయితే ప్రపంచంలో ఉంటూనే బాగా డబ్బు సంపాదించి ఆ పని చేసి ఉండవచ్చు. సన్యాస ఆశ్రమాన్నికి చెడ్డ పేరు తీసుకు రావద్దు. మీరు నాలుకను అదుపు చేయలేనప్పుడు, కాషాయాన్ని వదిలిపెట్టి, ప్రపంచంలోకి వెళ్లి, పని చేసి డబ్బు సంపాదించండి. కర్మ యోగం ద్వారా అభివృద్ధి చెందండి. నాలుకను నియంత్రించలేనప్పుడు మనస్సును నియత్రించడం సాధ్యం కాదు.

స్వామి శివానంద విరచిత గురుతత్వము - 22 వ భాగము

దత్తస్వరూపులు శ్రీ నృసింహ సరస్వతి స్వామి వారు 

నిజమైన గురువు యొక్క లక్షణాలు
నిజమైన గురువు యొక్క లక్షణాలు ఇవిగో. మీరు గనక ఈ లక్షణాలను ఏ వ్యక్తి లో చూసినా, ఆ వెంటనే అతడిని మీ గురువుగా అంగీకరించండి. సద్గురువు అనేవాడు బ్రహ్మనిష్ఠ మరియు బ్రహ్మశ్రోత్రియుడై ఉంటాడు. అతనికి ఆత్మ మరియు వేదాల గురించి పూర్తి జ్ఞానము ఉంటుంది. అతడు సాధకుల సందేహాలను నిర్మూలిస్తారు. అతనికి సమదృష్టి మరియు మనస్సంయమనం ఉంటుంది. అతడు రాగద్వేషాలు, హర్షశోకాలు, అహంకారము, కోపము, లౌల్యము, దురాశ, మోహము, పొగరు మొదలైన గుణాల నుంచి విముక్తుడై ఉంటాడు. అతడు దయాసముద్రుడు. అతని యొక్క సన్నిధిలోనే మనకు శాంతి లభిస్తుంది మరియు మనసు ఉన్నతమైన స్థాయికి వెళుతుంది. కేవలం ఆయన యొక్క సన్నిధిలో ఉండడం చేతనే సాధకుల యొక్క సకల సందేహాలు నివృత్తి అవుతాయి. అతడు ఎవరి నుంచి ఏమీ ఆశించడు. అతడు ఎంతో ఉన్నతమైన, గొప్ప వ్యక్తిత్వం కలిగి ఉంటాడు. అతడు ఎల్లప్పుడు బ్రహ్మానందంతో నిన్డి ఉంటాడు. అతడు నిజమైన సాధకుల కోసం వెతుకుతూ ఉంటాడు.

గురువు యొక్క పాదపద్మాలకు నమస్కారములు! నేను నిజమైన గురువు యందు పూర్తి విశ్వాసం ఉంచుతాను.గురువు పట్ల నాకు ఎంతో గొప్ప ఆదరము మరియు గౌరవము ఉన్నాయి. ఆయన యొక్క పాదపద్మాలను ఎల్లవేళలా సేవించడానికి నా హృదయం తపిస్తుంది. మనస్సు యొక్క దుష్పరిణామాలను తొలగించడంలో గురుసేవ కంటే మరేది శక్తివంతమైనది కాదని నేను నమ్ముతాను. ఈ సంసారమనే సాగరం నుంచి అమృతతత్త్వమనే అవతలి ఒడ్డుకి తీసుకువెళ్ళే సురక్షితమైన నౌక గురువు సన్నిధి అని నేను పూర్తిగా నమ్ముతాను.

గురుత్వము పేరుతో వ్యాపారం

కానీ నేను గురుత్వాన్ని వ్యాపారంగా చేయడాన్ని మెచ్చుకొను, నాకు నచ్చదు. ఎవరైతే మూర్ఖులు గురువులుగా ఆచార్యులుగా ప్రదర్శించుకుంటూ, శిష్యులను తయారు చేసుకుంటూ, ధనము పోగు చేస్తారో అటువంటి వారిని చూసి నేను ఎంతగానో అసహ్యించుకుంటాను, అవమానంగా తలుస్తాను. మీరు ఈ విషయంలో నాతో అంగీకరిస్తారు. ఇందులో రెండవ అభిప్రాయానికి తావులేదు. వారు సమాజానికి పట్టిన చీడ పురుగులు. గురుత్వం అనేది ఈనాడు వ్యాపారంగా మారిపోయింది. దీనిని భారతదేశపు భూమి నుంచి పూర్తిగా నిర్మూలించాలి. ఇది భారత ప్రజానీకానికి ఎంతో నష్టాన్ని మరియు హానిని కలిగిస్తోంది. పాశ్చాత్యులు మరియు ఇతర దేశస్థులు మనస్సులలో ఎంతో చెడు ముద్రను సృష్టిస్తోంది. ఈ గురుత్వమనే వ్యాపారం వలన భారత దేశము తన యొక్క ఆధ్యాత్మిక వైభవాన్ని కోల్పోతోంది. అతి త్వరగా భయంకరమైన ఈ వ్యాధిని త్రుంచి వేసి వేళ్ళతో సహా పెకిలించి వేయడానికి తీవ్రమైన చర్యలు చేపట్టాలి. దీని నిర్మూలించడంలో ఏ అవకాశాన్ని వదలకూడదు. అది ఈ ఈనాడు ఎంతో భయంకరమైన రూపాన్ని సంతరించుకుంది. అది ఎంతో త్వరగా అంటువ్యాధిలా వ్యాపిస్తోంది. చాలా సులభంగా, మర్యాదగల జీవనాన్ని గడపడానికి ఎంతోమంది ఈ గురుత్వం అనే వ్యాపారాన్ని తీసుకున్నారు. కుహనా గురువుల వలన ఎంతో మంది అమాయకమైన స్త్రీలు మరియు పురుషులు దోచుకోబడ్డారు. ఎంత సిగ్గుచేటు!

ఎందరో గురువులు అంతటా తిరుగుతారు. ఎన్నో చోట్ల ఉపన్యాసాలు ఇచ్చి ప్రవచనాలు చెబుతారు. బ్రహ్మ సూత్రాలు మరియు గీత అర్ధం చేసుకున్నా, వారు జ్ఞానశూన్యులు మరియు ధ్యానం గురించి అవగాహన లేదు. వారు సులభంగా ఆగ్రహానికి గురి అవుతారు. వారి యొక్క అభిమాని ఎంతో మృదువైనది. వారిలో దివ్య గుణాలు మరియు సాధుత్వం లేదు. వారికి సేవా భావం లేదు. వారు సేవ, కీర్తనలు మొదలైన వాటి గురించి చెడుగా మాట్లాడుతారు. వారు జనుల చెయ్యి పట్టుకొని దగ్గరకు పిలుస్తారు. వారి వెనుక భాగంలో చేతులు వేసి, వారిని దీవిస్తారు. కానీ వారు కనీసం ఒక్కడిని కూడా మోక్షానికి పంపలేకపోతున్నారు.

ఒక వ్యక్తి కొన్ని సిద్ధులను ప్రదర్శిస్తే జనులు అతడిని గురువుగా తీసుకుంటారు. ఇది ఎంతో ఘోరమైన తప్పిదము. ఇది అంత సులభంగా నమ్మే విషయం కాదు. ఇటువంటివారు దొంగ యోగుల వలన సులభంగా మోసపోతారు. వారు బుద్ధిమరియు విచక్షణాధికారాన్ని ఉపయోగించాలి. వారు గురువులుగా భావించే వ్యక్తుల గురించి ఏదైనా ఒక నిర్ణయానికి ముందు, ఆ గురువుల మార్గము, అలవాట్లు, స్వభావము, నడవడిక, వృత్తి, ప్రకృతి మొదలైనవి, క్షుణ్ణంగా పరిశీలించి; గ్రంథముల పట్ల, శాస్త్రముల పట్ల అతని జ్ఞ్ఞాన్ని, పరీక్షించాలి.

అటువంటి మేకవన్నె పులిలు, ఎవరైతే మన దేశ ప్రజలను తప్పు ద్రోవ పట్టించి, దోచుకునే ప్రయత్నం చేస్తారో, వారిని ఆశ్రయించడం కంటే కృష్ణుడు, రాముడు శివుడు, లేదా నీ హృదయంలో ఉన్న భగవంతుడిని గురువుగా భావించి, ఆయన యొక్క మంత్రాన్ని మననం చేయడం ఉత్తమము.

ప్రసిద్ధమైన, మహత్తరమైన భారతదేసంలో శ్రీ శంకరులు, దత్తాత్రేయులు వంటి నిజమైన గురువులు అంతటా వ్యాపించి ఉండుగాక! కుహనా గురువులు మరియు వ్యాపారపరమైన గురుత్వం అనే భయంకరమైన శాపం నుంచి భారతమాత సంపూర్తిగా స్వేచ్ఛను పొందుగాక! సనాతన ధర్మం యొక్క విశ్వజనీయమైన సూత్రాలు ప్రపంచమంతా తేజరిల్లు గాక! వివిధ మత శాఖలు మరియు మత వర్గాలను మధ్య ఐకమత్యం ఏర్పరచడంలో ఆధ్యాత్మికవేత్తలు తమకు సాధ్యమైన అన్ని ప్రయత్నములు చేయుదురుగాక! వారు కొత్త శాఖలను ఏర్పాటు చేయకుండా ఉండుదురుగాక! వర్గపరమైన బేధములు మరియు గొడవలు ఎల్లప్పటికీ నశించిపోవు గాక! ఋషులు, ద్రష్టలు, యోగులు, భక్తులు మరియు సన్యాసులు త్యాగము, సన్యాసం మరియు ఆత్మసాక్షాత్కారాన్ని లక్ష్యంగా పెట్టుకుని ఆధ్యాత్మిక దేశమైనా ఈ భూమి యొక్క గొప్ప కీర్తి ప్రతిష్టలను నిలబెట్టుదురుగాక! ప్రపంచమంతా ఐకమత్యం, శాంతి మరియు సామరస్యం వర్ధిల్లుగాక! గురువుల యొక్క ఆశీర్వచనాలు మనందరిపై ఉండుగాక! ఆధ్యాత్మిక పథంలో వారు మనల్ని మార్గదర్శనం చేయుదురుగాక!

ఏడవ అధ్యాయము సమాప్తము 

స్వామి శివానంద విరచిత గురుతత్వము - 21 వ భాగము

అరుణాచలేశ్వరుని పాదాలు 

స్త్రీలకు హెచ్చరిక

ఇటువంటి దొంగ గురువులు మరియు కుహనా ఆచార్యుల వలన స్త్రీలు సులభంగా మోసపోతారు. స్త్రీలు చాలా నిష్కపటమైన మనస్కులు మరియు దేనినైనా సులభంగా నమ్ముతారు. చక్కని సంగీతము మరియు స్వరమాధుర్యానికి వారు అతి సులభంగా ఆకర్షితులవుతారు. మధురమైన శబ్దాలకు ఆకర్షించబడి అతి త్వరగా బాధితులు అవుతారు. ఈ దొంగ గురువులు ఎల్లప్పుడూ మామూలు స్త్రీలను మోసం చేయాలని చూస్తారు. వారు వీరిని సులభంగా ప్రభావితం చేసి ఎటువంటి కష్టంలేకుండా వలలో పడేసి వాడుకుంటారు. వారిని పనిముట్లుగా చేసుకుంటారు. వారిని దోచుకుని వీరి కడుపునింపుకున్టారు మరియు ఖరీదైన పట్టు వస్త్రాలు మరియు గొప్ప చెప్పులు వేసుకుని తిరుగుతారు. స్త్రీలను శిష్యురాలిగా చేసుకోమని శాస్త్రాల్లో గృహస్థులలకు ఎక్కడా కనీసం అనుమతి కూడా ఇవ్వలేదు. మంచి జీవనం మరియు సంపాదన కోసం ఎవరైతే స్త్రీలను ఉపయోగించుకుంటారో, వారు అశుద్ధంలో జీవించే పురుగులు వంటి వారు. అలాంటి మూర్ఖులకు ప్రాయశ్చిత్తం లేదు. వారిని నిర్దయగా రౌరవము మరియు మహారౌరవంలో పడవేస్తారు.

దేవీ స్వరూపులారా! మీ కళ్ళు తెరవండి. మీరంతా ఇప్పుడు చదువుకున్నారు. మీ బుద్ధిని ఉపయోగించండి. కేవలం ఉపన్యాసాలను లేదా సంగోతాన్ని విని మోసపోకండి. గురువులుగా ప్రదర్శించుకునే వారి నుంచి జాగ్రత్తగా ఉండండి. ఒక గృహస్థును ఎన్నడు నీ గురువుగా చేసుకోకండి. అతడి నుంచి దీక్ష పొందకండి. ఒకవేళ అలా చేస్తే చివరకు మీరు చెడు పరిస్థితులను ఎదుర్కొనవలసి వస్తుంది. మీరు ఎంచుకునే వ్యక్తి ఉత్తమమైన, మచ్చలేని వ్యక్తిత్వం కలిగి ఉండాలి. అతడు పూర్తి నిస్వార్థంగా ఉంటూ కామము మరియు దురాశ నున్చి విముక్తుడై ఉండాలి. అన్ని రకముల భౌతిక ప్రలోభాలు/ కళంకాల నుంచి అతడు విముక్తుడై ఉండాలి. అతనికి వేదము మరియు గ్రంథముల జ్ఞానముండాలి. అతనికి ఆంతరంగికమైన ఆధ్యాత్మిక బలము మరియు మిమ్మల్ని ఉద్ధరించి, ఆధ్యాత్మికపథంలో నడుపుటకు ఆత్మ సాక్షాత్కారము కలిగిన వాడై ఉండాలి.

ఒక గురువు గురించి సరైన పరీక్ష చేయకుండా లేదా అతడిని అర్థం చేసుకోకుండా ఒక వ్యక్తిని గురువుగా ఎంచుకుంటామని భార్యలు అంటే భర్తలు అనుమతించకూడదు. నిజంగా ఒక వ్యక్తిని గురువుగా స్వీకరించాలి అని వారు భావిస్తే, ఆ వ్యక్తితో ఎంతో కాలం ఉన్న తర్వాత, అతడిని జాగ్రత్తగా పరిశీలించి, విచారించి అప్పుడు స్వీకరించాలి. భార్య భర్తకు వేరువేరు గురువులు ఉండకూడదు. గొడవలు జరుగుతాయి. వారిరువురికీ ఒకే గురువు ఉండాలి.

వివిధ మత శాఖలు మరియు విధానాల యొక్క ప్రమాదం

చైతన్య మహాప్రభువు, గురు నానక్ మరియు దయానంద స్వామి మొదలైన వారంతా సార్వత్రిక, సర్వజన సమ్మతమైన, ఘనమైన జీవులు. వారి యొక్క భోజనం బోధనలన్నీ ఉన్నతమైనవి మరియు విశ్వజనీనమైనవి. వారు ఏనాడు తమ సంత సొంత శాఖలను గాని మతాలను గాని ఏర్పరచాలని అనుకోలేదు. వారు కనుక ఇప్పుడు జీవించి ఉంటే వారిఅనుచరులు చేస్తున్నవాటి చూసి వారు ఎంతగానో ఏడ్చేవారు. అనుచరులే ఎంతో తీవ్రమైన తప్పులను మరియు దోషాలను చేస్తారు. వారు ఏనాడు విశాలమైన హృదయాన్ని వృద్ధి పరుచుకోలేదు. వారు సంకుచిత మనస్తత్వం గలవారు. పగలు, కలహాలు, వర్గ విభేదాలు మరియు అన్ని రకాల ఇబ్బందులను వారు సృష్టిస్తారు.

అలాగే ఆధ్యాత్మికగురువు కూడా తనదైన సొంత మార్గాన్ని ఏర్పరుచుకోకూడదు. అతడిని ఎంతో దీర్ఘమైన అంతర్ దృష్టి ఉండాలి. ఒక కొత్త శాఖను ఏర్పరచడం అంటే ప్రపంచ శాంతికి విఘాతం కలిగించడానికి ఒక కొత్త కారణాన్ని సృష్టించడం. అతడు దేశానికి చేసే మేలు కంటే హానియే ఎక్కువ. అతడు విశాలమైన సూత్రాలు మరియు బోధనలతో, కూడిన ఇతర మతాల సూత్రాలు మరియు బోధనలతో విభేధించని మరియు విశ్వజనీనంగా అంగీకరించబడి, అనుసరించదగిన వ్యవస్థను ఏర్పరచవచ్చు.

స్వామి శివానంద విరచిత గురుతత్వము - 20 వ భాగము

ఏడవ అధ్యాయము
గురువు అవ్వాలని పిచ్చి - భయంకరమైన రోగము

జటిలో ముండీ లుంఛితకేశః కాషాయాంబరబహుకృతవేషః|
పశ్యన్నపి చన పశ్యతి మూఢో ఉదరనిమిత్తం బహుకృతవేషః||

తాత్పర్యము - ఒకరు పెద్ద జడలు పెంచుకుంటారు. ఇంకొకరు తలను పూర్తిగా గొరిగించుకుంటారు. ఇంకొకరు కాషాయం కడతారు. దర్శించామని చెప్పుకున్న్నా, దాన్ని దర్శించని మూఢులు. కడుపు నింపుకోవడం కోసం ఒక వ్యక్తి ఎలాంటి వేషం ధరిస్తే ఏమి లాభము?

- ఆదిశంకరాచార్యులు

భారత దేశము అద్వైత సిద్ధాంతాన్ని ఇచ్చిన పవిత్ర భూమి. సకల జీవులలో ప్రాణం మరియు మరియు చైతన్యం ఒకటేనని చాటి చెప్పిన శ్రీ శంకరాచార్యులు, దత్తాత్రేయయుడు, వామదేవుడు మరియు జడభరతుడు పుట్టిన ఈ భూమి ఈనాడు అనేక వర్గాలుగా విభజించబడింది. ఎంతటి దయనీయ స్థితి. ఈరోజు నీవు చూస్తున్నది ఎంత శోకనీయమైన స్థితి. ఒక సముద్రపు ఒడ్డున ఉండే ఇసుక రేణువుల లెక్కించవచ్చునేమో కానీ ఈనాడు భారతదేశంలో ఉన్న మాతాల యొక్క సంఖ్యను లెక్కించడం ఎంతో కష్టం. ప్రతిరోజు భారతదేశంలో పుట్టగొడుగుల ఏదో ఒక 'ఇజాలు' పుట్టుకు వచ్చి, ఇంతకుముందు నుంచి ఇక్కడ ఉన్న దాన్ని పెరికి వేయాలాని చూస్తున్నాయి. నిరాశావాదులు ఉన్నదానిని విడిచిపెడుతున్నారు మరియు అంతటా వైరుధ్యం రాజ్యమేలుతోంది. మతశాకల మధ్య యుద్ధం నడుతూనే ఉంది. కలహాలు మరియు చీలికలు, న్యాయస్థానాల్లో దావా/ వ్యాజ్యాలు, వాగ్వాదాలు, కుమ్ములాటలు మరియు కుట్రలు అంతటా కనిపిస్తున్నాయి. ఎక్కడా కూడా సాంతి, సామరస్యం అనేదే లేదు. ఒక గురువు యొక్క శిష్యులు మరొక గురువు యొక్క శిష్యులతో రోడ్ల మీద మరియు వ్యాపారకేంద్రాల్లో గొడవకు దిగుతున్నారు.

దొంగ యోగులు మరియు నటించే గురువులు

హార్మోనియం మీద కొద్దిగా పట్టు మరియు వాగ్ధాటి కల యువకుడు, ఒక స్టేజి ఎక్కి కొన్ని సంవత్సరాల్లో తనను తాను ఒక గురువుగా ప్రదర్శించుకుని, కొన్ని చెత్త కరపత్రాలు మరియు పాటలు రాసి, తనదైన సొంత శాఖను ఏర్పరుచుకుంటాడు. భారతదేశము నిండా ఇంకా ఇటువంటి విస్తారముగా మూర్ఖత్వం ఉంది మరియు ఏ వ్యక్తి అయినా తక్కువ సమయంలో అనుచరులను పొందగలరు.

ఒక యువకుడు ఆసనాలు, బంధాలు మరియు ప్రాణాయామం మీద కొద్దిపాటి శిక్షణ పొంది, ఒక భూగృహం లోని గదికి రహస్యంగా 40 రోజులకు సరిపడా కొన్ని ఆహార పదార్థాలను ముందే తీసుకెళ్లి, తలుపు మూసేసుకుని, కూర్చుటాడు. ఆకలి మరియు దాహార్తిని నశింపచేసే కొన్ని వ్రేళ్ళను కొన్ని రోజులపాటు తింటాడు. అతను ఆ గృహములో ఏమి చేస్తున్నాడో భగవంతునికే తెలుసు. అతడు ఆ గదిలో నిద్రిస్తాడు. ఇన్నాళ్లు సమాధిలో ఉన్నట్టుగా నటించి బయటకు వస్తారు. ఇది కొద్దిపాటి తితిక్షను ఆచరిస్తేనే ఒనగూరుతుంది. అతని వాసనలను మరియు సంస్కారాలు ఏ మాత్రం నశించలేదు. అతడు ఈనాటికీ అదే భౌతిక ప్రపంచపు మనిషి. అతడు డబ్బు సంపాదించుటకు మరియు శిష్యులను తయారు చేసుకొనుటకు, అనేక చోట్ల సంచరిస్తాడు. అతడు యోగి అయిన గురువుగా నటిస్తాడు. అజ్ఞానులైన భౌతికమానవులు సులభంగా మోసపోతారు. ఇక్కడ విచారకరమైన విషయం ఏమిటంటే ఇలా బాధ్యతారాహిత్యంగా మూర్ఖత్వపు పనులు చేసే ఇటువంటి యువకుల వలన, నిజమైన సమాధిలోకి వెళ్ళే నిజమైన యోగుల మిద జనులు విశ్వాసం కోల్పోతారు.

ఈ యువకులు యోగము మరియు ఆధ్యాత్మిక జీవనం యొక్క సారాన్ని ఏమాత్రము గ్రహించలేదు. సమాధి అనేది బహిరంగంగా రోడ్ల మీద ప్రదర్శించేది కాదు. సమాధి అనేది ఒక దివ్యమైన చర్య. సమాధి అనేది ఒక ఇంద్రజాలము లేదా మాయ కాదు. ఇటువంటి చేష్టలు అన్ని చోట్లా వ్యాపిస్తున్నాయి. ఎందరో యువకులు ఇటువంటి వాటిని ప్రదర్శిస్తున్నారు.

ఇటువంటి దొంగ యోగులు, నకిలీ గురువులు మరియు మోసకారులు సమాజానికి భారమైన వారు మరియు చీడ పురుగుల. వారు దేశానికి ప్రమాదకారులు మరియు అజ్ఞానులు, సులభంగా నమ్మేవారి సంపద పట్ల రాబందుల వంటి వారు. వారి నుంచి జాగ్రత్తగా ఉండండి.

కొందరు వారు ముసలివారు అయిన తర్వాత సేవ పొందుట కొరకు శిష్యులను ఏర్పరుచుకుంటారు. వారు తమ శిష్యులకు యొక్క ఉన్నతి గురించి పట్టించుకోరు.

స్వామి శివానంద విరచిత గురుతత్వము - 19 వ భాగము

ఒకసారి దత్తాత్రేయుడు అడవిలో ఆనందంగా సంచరిస్తున్న సమయంలో, యదు అనే పేరు గల రాజును కలిశారు. ఆయన దత్తాత్రేయుడు ఎంతో ఆనందంగా ఉండడం చూసి, ఆయన యొక్క ఆనందానికి కారణం అయిన రహస్యాలు మరియు ఆయన గురువు గారి పేరు అడిగారు. దత్తాత్రేయుడు తనకు ఆత్మ మాత్రమే గురువు అని, అయినప్పటికీ 24 వ్యక్తులు జీవుల నుంచి జ్ఞానం పొందాలనని, అందువల్ల వారు తన గురువులని చెప్పారు.

దత్తాత్రేయుడు 24 మంది గురువుల పేర్లు మరియు వారి నుంచి తాను ఏమి నేర్చుకున్నారనేది చెప్పారు.

దత్తుడు ఇలా చెబుతున్నారు: "నా 24 మంది గురువులు - 1.భూమి 2.నీరు 3.గాలి 4.అగ్ని 5.ఆకాశము 6.చంద్రుడు 7.సూర్యుడు 8.పావురము 9.కొండచిలువ 10.సముద్రము 11. మిణిగురు పురుగు 12.తేనెటీగ 13. బాటసారి లేదా తేన పట్టువాడు 14.ఏనుగు 15.జింక 16.చేప 17. పింగళ అనే నాట్యకారిణి 18.కాకి 19.పసిపిల్లవాడు 20.యుక్త వయసులో ఉన్న కన్య 21.సర్పము 22.బాణాములు తయారు చేయువాడు 23. సాలీడు 24.భ్రమరము/ తుమ్మెద

1. సహనం కలిగి ఉండటం మరియు పరులకు మేలు చేయటం అనేది నేను భూమి నుంచి నేర్చుకున్నాను. ఎందుకంటే మనిషి తనకు ఎంత అపకారం చేసినా, ఎంత హాని చేసినా భూమి భరిస్తుంది మరియు అతనికి చక్కని పంట, మొక్కల ఇస్తూ అతనికి మేలు చేస్తుంది.
2. నీటి నుంచి నేను పవిత్రంగా ఉండటం నేర్చుకున్నాను. మీరు ఎలాగైతే ఇతరులను శుద్ధి చేస్తుందో, అలాగే యోగి లేదా ఋషి, పవిత్రుడు మరియు స్వార్థము, లౌల్యము, అహంకారము, కోపము, దురాశ మొదలైన వాటి నుంచి విముక్తుడైన వాడు, తన వద్దకు వచ్చిన వారందరినీ పవిత్రులను చేస్తాడు.
3. గాలి అన్ని వస్తువుల మీద నుంచి వీచినప్పటికి, అది దేనికి అంటుకోదు. అలా నేను అనేక మంది ప్రజల మధ్య ప్రపంచంలో సంచరించరిస్తున్నప్పటికీ, వాయువు నుంచి బంధరహితంగా ఉండడం నేర్చుకున్నాను.
4. అగ్ని దివ్యంగా వెలుగుతూ ఉంటుంది. అలాగే యోగి లేదా ఋషి, తన యొక్క జ్ఞానము మరియు తపస్సు ద్వారా దివ్యంగా ప్రకాశించాలి.
5. నక్షత్రాలు, గాలి మరియు మేఘాలు మొదలైనవి ఆకాశంలో ఉన్నప్పటికీ, ఆకాశము వాటితో ఏ విధంగానూ బంధం కలిగి ఉండదు. ఆత్మ ఆకాశంవలే సర్వవ్యాప్తమై ఉన్నప్పటికీ, అది దేనితోనూ సంపర్కం కలిగి ఉండదని ఆకాశము ద్వారా నేర్చుకున్నాను.
6. చంద్రుడు ఎల్లప్పుడు పూర్ణంగానే ఉన్నప్పటికీ భూమి యొక్క నీడ చంద్రుని మీద పడిన కారణం చేత అతనిలో క్షీణత లేదా వృద్ధి ఉంటుంది. అలాగే ఆత్మ ఎల్లప్పుడు పూర్ణంగా మరియు ఏం మార్పుకులోను కాకుండా ఉన్నప్పటికీ, ఉపాధులు లేదా వివిధ జన్మలు యొక్క నీడ కారణం చేత అది తాను పరిమితం అనుకుంటుందని నేను తెలుసుకున్నాము.

7. ఎలాగైతే సూర్యుడు తన కింద ఉంచిన అనేక నీటి పాత్రలు వేరువేరు బింబాలుగా కనిపిస్తాదో, అలాగే న్రహ్మము ఒకటే అయినా, మనస్సు యొక్క పరావర్తనం చేత వివిధ ఉపాధులలో ఉన్న కారణంగా, వేరువేరుగా కనిపిస్తుంది. ఇది నేను సూర్యుని నుంచి నేర్చుకున్నాను.

8. ఒకసారి నేను రెండు గువ్వ పిట్టలు తమ పిల్లలతో ఉండడం చూశాను. ఒక వేటగాడు వల వేసి వాటి పిల్లలను పట్టుకున్నాడు. తన పిల్లల పట్ల ఆ తల్లికి ఉన్న ప్రేమ కారణంగా ఆమె తన జీవితాన్ని సైతం లెక్క చేయక వలలోకి దూకి, అతడికి పట్టుబడింది. మగ పావురం ఆడ పట్ల ఎంతో ఇష్టం పెంచుకుంది. అందువల్ల అది కూడా వలలో పడి పట్టుబడింది. దీనివల్ల రాగమే బంధానికి కారణం అని నేను తెలుసుకున్నాను.

9. కొండచిలువ తన ఆహారం కోసం ఎక్కడికి కదలదు. అది ఒక చోటే ఉంటూ తనకు దక్కిన దానితోనే సంతృప్తి చెందుతుంది. అలాగే నేను ద్వారా అజగ్రవృత్తి ద్వారా దొరికిన ఆహారాన్నే తింటూ, ఆహారం పట్ల మనసు పెట్టక, సంతృప్తిగా ఉండాలని నేర్చుకున్నాను.

10. వందల నదులు సముద్రంలో కలిస్తున్నప్పటికీ, సముద్రం చలించకుండా ఉంటుంది. అలాగే జ్ఞాని కూడా అన్ని రకాల ప్రలోభాలు, నష్టాలు మరియు బాధలలకు చలించకుండా ఉండాలని నేను సముద్రం నుంచి తెలుసుకున్నాను.

11. ఎలాగైతే మిణిగురు/ దీపపు పురుగు అగ్ని యొక్క దివ్యమైన కాంతి చూసి, ఆకర్షితమై, అందులోకి దూకి ఆహుతి అవుతుందో, అలాగే కామోద్రేకం కలిగిన వ్యక్తి అందమైన యువతితో ప్రేమలో పడి, చివరకు శోకిస్తాడు. నయేంద్రియం (కన్ను) ను నిగ్రహించాలని, దృష్టిని ఆత్మపై నిలపాలని నేను దీపపు/ మిణుగురు పురుగు ద్వారా నేర్చుకున్నాను.

12. ఎలాగైతే తేనేటీగ రకరకాల పుష్పాల నుంచి తేనెను సేకరిస్తుందో, ఒకే పువ్వుకు పరిమితం కాదో, అలాగే నేను కూడా ఒక్కో ఇంటి నుంచి కొద్దిగా మాత్రమే స్వీకరించి, వేరు ఇంటికి వెళుతూ, నా ఆకలిని తీరుచుకోవాలని, అలా నా మధుకరి వృత్తిని కొనసాగిస్తూ, ఏ గృహస్థుకు భారం కాకూడదని తెలుసుకున్నాను.

13. తేనెటీగలు ఎంతో శ్రమపడి తేనెను సేకరిస్తాయి, కానీ బాటసారి వచ్చి సులువుగా దాన్ని తీసుకెళ్తాడు. అలాగే ఎంతో కష్టపడి సంపదలు మరియు ఇతర వస్తువులను సంపాదిస్తారు మానవులు కానీ మరణం రాగానే ఇవన్నీ, ఒక్కసారిగా వదిలేసి యముడి వెంట వెళ్ళిపోతారు. అలా వాటి నుంచి నేను అనవసరమైన వస్తువులను పోగు చేయకూడదని తెలుసుకున్నాను.

14. మగ ఏనుగుకు ఆడఏనుగు స్పర్శ అంటే చాలా ఇష్టం. అందువల్ల ఏనుగును పట్టుకోవాలనుకున్న మావటి వాడు, ఒక పెద్ద గొయ్యి తీసి, దాని మీద గడ్డి పరచి, ఆ పైన గడ్డితో చేసిన ఒక ఆడ ఏనుగు బొమ్మ పెడతాడు. అది చూసిన మగ ఏనుగు, ఆ బొమ్మను ఆడఏనుగు అని భావించి, కామంతో కళ్ళు మూసుకుపోయి, ఆ గుంతలో పడిపోతుంది. ఆ విధంగా అది పట్టుబడి, బంధిన్చబడి, మావటి వాడిచేత హింసించబడుతుంది. అలాగే కామోద్రేకం కలిగిన వ్యక్తి స్త్రీ యొక్క స్పర్శ వలలో పడి దఃఖం పొందుతాడు. కనుక వ్యక్తి కామాన్ని నశింప చేసుకోవాలి. ఇది నేను ఏనుగు నుంచి నేర్చుకున్నాను.

15. జింకకు సంగీతం అంటే ఇష్టం. అది వేటగాని యొక్క సంగీతానికి ఆకర్షించబడి అతడికి బలవుతుంది. అలాగే వ్యక్తి జారత్వం కలిగిన స్త్రీ యొక్క సంగీతానికి ఆకర్షితుడై తన వినాశనాన్ని కోరి తెచ్చుకుంటాడు. కనుక వ్యక్తి ఎన్నడూ కామోద్రేకాన్ని కలిగించే సంగీతాన్ని వినకూడదు. ఇది నేను జింక నుంచి నేర్చుకున్నాను.

16. ఒక చేప ఏవిధంగానైతే అత్యాశకు పోయి ఆహారం కోసం జాలరి బారిన పడుతుందో అలాగే మానవుడు ఆహారం పట్ల అత్యాశకు పోయి, అతని రసేంద్రియము అతనిమీద ఆధిపత్యం చలాయించే స్థాయికి తెచ్చుకుని, తన స్వతంత్రాన్ని కోల్పోయి, సులభంగా నశిస్తాడు. అందువలన రుచిగల ఆహారం కోసం తపించడం వదిలి పెట్టాలి. ఇది చేప నుంచి నేర్చుకున్నాను.

17. ఒకప్పుడు విదేహ రాజ్యంలో పింగళ అనే పేరుగల నాట్యకారిణి ఉండేది. ఒక రాత్రి ఆమె విటుల కోసం ఎదురు చూసి అలసిపోయింది. చివరకు నిరాశ చెందింది. అప్పుడు ఆమె తనకున్న దానితో సంతృప్తి చెంది హాయిగా నిద్రపోయింది. పతనం చెందిన ఆ స్త్రీ నుంచి ఆశను లేదా కోరికలను వదులుకోవడం చేతనే సంతృప్తి కలుగుతుందని నేను నేర్చుకున్నాను.

18. ఒక కాకి తనకు దొరికిన ఒక మాంసపు ముద్ద తీసుకున్నది. అది చూసిన మిగితా పక్షులు కాకిని వెంబడించి, పొడిచాయి. అది అంతిమంగా మాంసపు ముద్దను వదిలిపెట్టి, శాంతి మరియు విశ్రాంతి పొందింది. ఈ ప్రపంచంలో ఉన్న మనిషి విషయసుఖాల వెంట పడినంత కాలమూ అన్ని రకాల కష్టనష్టాలకు పొందుతాడని, మరియు పక్షి వదిలేసినట్టుగా ఇందిర్యసుఖాల పట్ల ఆసక్తిని విడిచిపెట్టినప్పుడు ఆనందపడతాడని దీని నుంచి నేను నేర్చుకున్నాను.

19. తల్లి పాలు త్రాగే పసిపిల్లవానికి ఏ బాధలు, ఆవేశాలు, ఆందోళనలు ఉండవు, మరియు ఎల్లప్పుడూ సంతోషంగా ఉంటాడు. ఈ విధంగా సంతోషంగా ఉండడం అనే గుణాన్ని నేను పసిపిల్లవాడి నుంచి నేర్చుకున్నాను.

20. యుక్తవయసుకు వచ్చిన ఒక అమ్మాయి యొక్క తల్లిదండ్రులు చక్కని వరుని వెతకడం కోసం వెళ్లారు. ఆ అమ్మాయి ఒంటరిగా ఇంట్లో ఉంది. ఆమె తల్లిదండ్రులు లేని సమయంలో పెళ్లి చూపుల నిమిత్తమై కొందరు వ్యక్తులు ఆమె ఇంటికి వచ్చారు. స్వయంగా ఆమె వారిని లోనికి ఆహ్వానించింది. వారిని కూర్చోబెట్టి ఆమె వరి పొట్టు తీయడం కోసం వరి దంచడానికి వెళ్ళింది. ఆమె దంచుతున్న సమయంలో చేతి గాజుల రాపిడి వలన తీవ్రమైన శబ్దం వచ్చింది. తెలివి గల అమ్మాయి గాజుల యొక్క శబ్దం చేత స్వయంగా తనే దంచుతున్నానని మరియు వేరొకరిని ఈ పని కోసం పెట్టుకునే స్థోమత తన కుటుంబానికి లేదని, వచ్చిన వారు భావిస్తారని పసిగట్టి రెండు చేతులకు రెండు గాజులు చొప్పున ఉంచుకొని మిగతావి పగులగొట్టాలని నిర్ణయించుకుంది. అలాగే ఆమె తన రెండు చేతులకు రెండు గాజులు చొప్పున మిగుల్చుకుని మిగతావి విరగొట్టింది. రెండు గాజులు కూడా శబ్దం చేశాయి. అప్పుడామె ఒక్కొక్క గాజు చొప్పున విరగొట్టింది. దాంతో ఇక శబ్దం రాలేదు మరియు ఆమె తన నిశ్చింతగా తన పనిలో మునిగిపోయింది. ఈ ప్రపంచంలో అనేక మంది మధ్య బ్రతకడం విభేదాలకు, కలతలకు, గొడవలకు మరియు జగడాలకు కారణమవుతుంది. కనీసం ఇద్దరు ఉన్నా కూడా అనవసరమైన మాటలు పొడచూపుతాయి. కనుక సన్యాసి ఎల్లప్పుడూ ఒంటరి గా ఉండాలని ఈ అమ్మాయి యొక్క అనుభవం ద్వారా నేను నేర్చుకున్నాను.

21. సర్పము తనకు తానుగా పుట్ట నిర్మించుకోదు. ఇతరులు పెట్టిన పుట్టలు మీద అది ఆధారపడుతుంది. అలాగే ఒక సాధువు లేదా సన్యాసి తనకోసం తాను గృహము నిర్మించుకోకూడదు. ఇతరులు నిర్మించిన గుహలు లేదా ఆలయాల్లో జీవించాలి. ఇది నేను పాము నుంచి నేర్చుకున్నాను.

22. బాణాలు చేసే వ్యక్తి యొక్క మనసు పూర్తిగా ఆ బాణాన్ని సరిగ్గా, పదునుగా చేయడంలోనే నిమగ్నమైంది. అతను అలా పనిలో మునిగి ఉన్నప్పుడు, ఒక రాజు అతని ఇంటి ముందు నుంచి తన పూర్తి సైన్యం మరియు పరివారంతో వెళ్లారు. కొంత సమయం తర్వాత ఒక వ్యక్తి అతని వద్దకు వచ్చి, రాజు మీ ఇంటి ముందు నుంచి వెళ్ళాడా అని అడిగారు. ఆ కమ్మరి వ్యక్తి తను గుర్తించలేదని సమాధానం ఇచ్చారు. ఇక్కడ విషయం ఏమిటంటే ఆ కమ్మరి వ్యక్తి యొక్క మనసు పూర్తిగా పని యందే నిమగ్నమై, అతను పట్టించుకోలేదు. మనస్సు యొక్క ఏకాగ్రత ఎంత తీవ్రంగా ఉండాలనే గుణాన్ని నేను ఆ కమ్మరి వ్యక్తి నుంచి నేర్చుకున్నాను.

23. సాలీడు తన నోటి ద్వారా పొడవైన దారాలను వదిలి, వాటిని అల్లుతూ గూడు నిర్మించుకుంటుంది. అది తన నిర్మించుకున్న గూడునే అంటిపెట్టుకొని ఉంటుంది. అలాగే మానవుడు తన సొంత భావాలను ఏర్పరుచుకుని, వాటిలోని కొట్టుమిట్టాడుతూ ఉంటాడు. కనుక జ్ఞ్ఞాని ప్రాపంచిక ఆలోచనలు వదిలి పెట్టి, బ్రహ్మ, గురించే ధ్యానించాలి. ఇది నేను సాలీడు నుంచి నేర్చుకున్నాను.

24. తుమ్మెద లేదా భ్రమరం ఒక చిన్న పురుగును తీసుకువచ్చి తన గూట్లో పెట్టి దాన్ని ఒకసారి కుడుతుంది. పాపం ఆ పురుగు తుమ్మెద వస్తుందేమో, మళ్ళీ కొడుతుందేమోనని భయపడి తుమ్మెద గురించి తీవ్రంగా నిరంతరంగా ఆలోచించి తుమ్మెదగా మారుతుంది. అట్లాగే మనిషి నిరంతరం ఏ రూపం గురించి ధ్యానం చేస్తాడో, కాలక్రమంలో అతడు అదే రూపాన్ని పొందుతాడు. మానవుడు తాను ఏది ఆలోచిస్తే అదే అవుతాడు. ఆత్మ మీద ధ్యానం ద్వారా నన్ను నేను తెలుసుకుని, ఆత్మసాక్షాత్కారం పొంది, శరీర బంధాల నుంచి బయటపడి, మోక్షాన్ని పొందాలని తుమ్మెద మరియు పురుగు నుంచి నేర్చుకున్నాను.

దత్తాత్రేయుని బోధనలతో రాజు ఎంతగానో ముగ్ధుడయ్యాడు. దత్తాత్రేయుడు సకల విధములైన అసహనములు లేదా పక్షపాతాలు మంచి పూర్తి విముక్తుడు. తనకు ఎదురుగా వచ్చిన ప్రతి దాని నుంచి ఆయన జ్ఞానం పొందారు. జ్ఞానాన్ని ఆశించే సాధకులందరూ దత్తాత్రేయుని ఒక ఉదాహరణగా తీసుకుని అనుసరించాలి.

ఆరవ అధ్యాయము సమాప్తము 

స్వామి శివానంద విరచిత గురుతత్వము - 18 వ భాగము

ఆరవ అధ్యాయము
శ్రీ గురు దత్తాత్రేయుడు మరియు ఆయన 24 గురువులు

ఆదౌ బ్రహ్మ మధ్యే విష్ణుర్ అంతే దేవాః సదాశివః |
మూర్తిత్రయ స్వరూపాయ దత్తాత్రేయ నమోస్తుతే ||

ఆది లో బ్రహ్మ గాను, మధ్యలో విష్ణువు గాను, అంతంలో శివుని గాను, త్రిమూర్తుల స్వరూపంగా ఉన్న దత్తాత్రేయ నమస్కారములు.

బ్రహ్మజ్ఞానమయీ ముద్ర వస్త్రేచాకాశభూతలే |
ప్రజ్ఞానఘనబోధయ దత్తాత్రేయ నమోస్తుతే ||

గిర్నార్ పర్వతశ్రేణులకు ప్రభువైనవాడు, బ్రహ్మ జ్ఞానమే ముద్రగా వాడు ధరించినవాడు; భూమి, ఆకాశాన్ని తన వస్త్రములుగా కట్టుకున్నవాడు, ఘనమైన జ్ఞాన స్వరూపుడు, అయిన దత్తాత్రేయునకు మళ్ళీ మళ్ళీ నా నమస్కారములు. (శ్రీ ఆది శంకరాచార్యులు)

అనసూయ మాతను పాతివ్రత్యానికి ఉదాహరణగా చెబుతారు మరియు ఆవిడ సప్తఋషులలో ఒకరైన, గొప్ప ఋషి అయిన అత్రి మహర్షి యొక్క ధర్మపత్ని. ఆవిడ పతివ్రత ధర్మంలో ఎంతో గొప్పగా నిలబడింది. ఆమె తన భర్తను గొప్ప భక్తితో సేవించింది. బ్రహ్మ విష్ణు మరియు శివులకు సమానమైన పుత్రులను పొందుట కొరకు ఆవిడ ఎంతో కాలం తీవ్రమైన తపస్సు చేసింది.

ఒకసారి నారదుడు ఒక చిన్న ఇనుప - గుళిక (గోళము) తీసుకొని సరస్వతీదేవి వద్దకు వెళ్లి, ఆమెతో ఇలా అన్నారు; "సరస్వతి దేవి! దయ చెసి ఈ ఇనుపగుళికను వేయించండి. ఈ ఇనుపగుళికను నేను నా ప్రయాణం లో ఆరగిస్తాను." సరస్వతీదేవి నవ్వి "నారదమహర్షి ఈ ఇనుపగుళికను ఎలా వేఁపగలరు? దీన్ని ఎలా తినగలరు?" అని అలా అన్నది. అటు తర్వాత నారదుడు మహాలక్ష్మి మరియు పార్వతి దేవి వద్దకు వెళ్లి ఆ ఇనుప గుళికను వేఁపమని అర్ధించాడు. వాళ్లు కూడా నారదుడిని చూసి నవ్వారు. అప్పుడు నారదుడు ఇలా అన్నారు; "దేవిలారా! చూడండి, నేను ఈ భూ ప్రపంచంలోనే అతి గొప్ప పతివ్రత, అత్రి మహర్షి భార్య అయిన అనసూయ మాత వద్దకు వెళ్ళి, దీన్ని వేయించి, తీసుకువస్తాను" అన్నారు.

అప్పుడు నారదుడు అనసూయమాత వద్దకు వచ్చి ఆ ఇనుపగుళికను వేయించమని అర్ధించాడు. అనసూయ మాత ఆ ఇనుప గుళికను పెన్నంలో పెట్టి, ఆమె భర్త యొక్క రూపం మీద ధ్యానం చేసి, తన భర్త పాదాలను కడుగగా ఉన్న నీటిలో కొన్ని చుక్కలను, ఆ గుళిక మీద చల్లింది. ఒక్కసారిగా ఆ ఇనుపగుళిక వేఁపబడింది. నారదుడు సరస్వతీదేవి లక్ష్మీదేవి మరియు పార్వతి దేవులకు వద్దకు వెళ్లి, వేయించిన ఆ గుళికను వారి ముందే తిన్నారు. మరియు వారికి కూడా కొంచెం కొంచెం ఇచ్చారు. అతడు ఆమెను మరియు ఆమె యొక్క పాతివ్రత్యాన్ని ఎంతగానో పొగిడారు. అప్పుడు నారదుడు ఆమెకు బ్రహ్మ విష్ణు శివులకు కు సమానమైన పుత్రుడు కలగాలన్న కోరిక నెరవేర్చాలని సంకల్పించారు.

ఆయన సరస్వతీ, లక్ష్మీ, పార్వతులతో : "మీ గనక మీ యొక్క పతులకు విశ్వాసంతో, నిజాయతీతో మరియు భక్తితో సేవ చేసి ఉంటే మీరు కూడా ఇనుపగుళికను వేయించి ఉండేవారు. అనసూయ యొక్క పతివ్రతా ధర్మాన్ని పరీక్షించమని మీ యొక్క భర్తలను అర్ధిన్చండి."

అప్పుడు సరస్వతీ, లక్ష్మీ, పార్వతులు తమ పతులను అత్రి మహర్షి యొక్క పత్ని అయిన అనసూయమాత యొక్క పాతివ్రత్య ధర్మాన్ని పరీక్షించమని, వారికి నిర్వాణ భిక్ష అనగా వస్త్రము లేకుండా వివస్త్రగా బిక్ష ఇమ్మని అడగమన్నారు.


త్రిమూర్తులు నారదుని యొక్క చర్యలు, అలాగే అనసూయ మాత యొక్క తపస్సు మరియు కొరికను తమ జ్ఞాన దృష్టి ద్వారా తెలుసుకున్నారు. వారు అంగీకరించారు. అప్పుడు త్రిమూర్తులు సన్యాసి రూపం ధరించి, అనసూయ మాత ముందు ప్రత్యక్షమై, ఆమెను నిర్వాణ భిక్ష ఇమ్మన్నారు. అనసూయమ్మ గొప్ప సంధిగ్దానికి గురైంది. భిక్షుకులకు ఆమె కాదు అని చెప్పలేదు. అలాగే ఆమె యొక్క పాతివ్రత్య ధర్మాన్ని నిలుపుకోవాలి. కాబట్టి ఆమె తన భర్త రూపాన్ని ధ్యానించి, ఆయన పాదముల యందు సరణాగతి చేసి, తన భర్త పాదాలను కడుగగా ఉన్న నీటి నుంచి కొన్ని చుక్కలను ఆ సన్యాసుల మీద చిలకరించింది/ చల్లింది. త్రిమూర్తులు ఆ చరణామృత మహిమ చేత ముగ్గురు పిల్లలుగా మారిపోయారు. అదే సమయంలో యొక్క స్తన్యములలో పాల ఉత్పత్తి జరిగింది. ఆమె ముగ్గురు పిల్లలను తన కన్నబిడ్డలుగా భావించి, నగ్నస్థితిలోనే వారికి పాలు పట్టి, ఊయలలో వేసింది ఊపింది. అంతకముందే స్నానానికి వెళ్లిన భర్త రాక కోసం ఎంతో ఆతృతతో ఎదురు చూడసాగింది.

అత్రి మహర్షి తన ఆశ్రమానికి తిరిగి రాగానే, ఆయన లేని సమయంలో జరిగినవన్నీ అనసూయ మాత పూసగుచ్చినట్టు చెప్పింది. ఆ పిల్లలను ఆయన పాదాల వద్ద ఉంచి, ఆయనను పూజించింది. కానీ అత్రిమహర్షికి తన దివ్యదృష్టి ద్వారా జరిగినదంతా ముందే తెలుసు. ఆ ముగ్గురు పిల్లలను ఆయన దగ్గరకు తీసుకున్నారు. ముగ్గురు పిల్లలు రెండు కాళ్లతో, ఒక మొండెంతో, మూడు శిరస్సులతో మరియు ఆరు చేతులతో ఒకే పిల్లవానిగా మారారు. అత్రి మహర్షి తన భార్యను ఆశీర్వదించి, త్రిమూర్తులు పసిపిల్లలుగా రూపంలో తన వద్దకు వచ్చి అనుగ్రహించారని ఆమెకు తెలియపరిచారు.


నారదుడు బ్రహ్మలోకానికి, వైకుంఠానికి మరియు కైలాసానికి వెళ్ళి సరస్వతి, లక్ష్మీ మరియు పార్వతులకు తమ భర్తలు అనసూయ మాత వద్ద నిర్వాణ బిక్షకు వెళ్ళి ఆమె యొక్క పాతివ్రత్య ధర్మం యొక్క శక్తి చేత చిన్న పిల్లలుగా మారిపోయారని, ముగ్గులు అమ్మవార్లు అక్కడకు వెళ్లి అత్రిని భర్తబిక్ష అడగని యెడల, వారు తిరిగి తమ రూపం తీసుకోలేరని చెప్పారు. సరస్వతీ, లక్ష్మీ, పార్వతులు సామాన్య స్త్రీ రూపం ధరించి, అత్రి మహర్షి వద్దకు వెళ్లి పతిబిక్ష పెట్టమని అడిగారు. "ఓ మహర్షి మా భర్తలను తిరిగి మాకు ఇవ్వండి" అన్నారు. అత్రి మహర్షి ఆ ముగ్గురు స్త్రీలను విధిగా గౌరవించి, చేతులు జోడించి ప్రార్థన చేసి, తన కోరిక మరియు తన భార్య అయిన అనసూయ కోరిక నెరవేర్చమని వేడుకున్నారు. అప్పుడు త్రిమూర్తులు అత్రి ముందు తన నిజరూపం స్వీకరించి ఇలా అన్నారు- "ఈ పిల్లవాడు నీ మాట ప్రకారం గొప్పఋషి అవుతాడు మరియు అనసూయ మాత యొక్క కోరిక మేరకు మాకు సమానుడౌతాడు. ఈ పిల్లవాడు దత్తాత్రేయ నామముతో ప్రసిద్ధి పొందుతాడు". అలా చెప్పి వారు అదృశ్యమయ్యారు.

దత్తాత్రేయుడు యుక్తవయసుకు వచ్చాడు. ఆయనలో త్రిమూర్తుల అంశతో ఉన్నందున మరియు ఆయన గొప్ప జ్ఞాని అయినందువలన ఋషులు మరియు సాధువులందరూ పూజించారు. ఆయన సౌమ్యముగా, శాంతముగా మరియు మరియు స్నేహపూర్వకంగా ఉండేవారు. ఆయనను నిత్యము ఎంతోమంది జనులు అనుసరిస్తూ ఉండేవారు. దత్తాత్రేయుడు వారందరినీ వదిలించుకోవాలని అనుకున్నప్పటికీ, ఆయన చేసిన ప్రయత్నాలన్నీ విఫలమయ్యాయి. ఒకసారి ఆయనను ఎంతో మంది వ్యక్తులు చుట్టుముట్టి ఉన్నప్పుడు, ఆయన స్నానం కోసం అనే నదిలోకి ప్రవేశించి, మూడు రోజుల వరకు బయటకు రాలేదు. ఆయన నీటిలోనే సమాధి స్థితిలో ఉన్నారు. ఆయన మూడవ రోజు బయటకు వచ్చినప్పుడు, ఆయన యొక్క రాకకోసం జనులు ఆ నది ఒడ్డున కూర్చుని ఉండడం చూసారు.

ఈ పద్ధతిలో వదిలించుకోవడం ఆయనకు సాధ్యం కాలేదు. ఆయన వేరొక ప్రణాళికను అనుసరించారు. ఆయన తన యోగశక్తితో ఒక అందమైన అమ్మాయి మరియు ఒక మందు/ సారాయి సీసాలను సృష్టించారు. ఆయన నీటిలో నుంచి ఒక చేత్తో అమ్మాయిని మరియు ఇంకొక చేతితో సారాయి సీసాను పట్టుకుని బయటకు వచ్చారు. జనులందరూ ఆయన తన యోగం నుంచి భ్రష్టుడయ్యాడని తలచి, ఆయనను వదిలి వెళ్ళిపోయారు.

దత్తాత్రేయుడు ఆయన వద్ద ఉన్న అన్ని రకాల వస్తువులను, అలాగే తన దుస్తులను సైతం కూడా అవతలపడేసి, అవధూతగా మారారు. వేదాంతం యొక్క సత్యాలను ప్రవచించి బోధించడానికి దేశాటనకు వెళ్లారు. దత్తాత్రేయుడు సుబ్రహ్మణ్య స్వామి లేదా కార్తికేయునకు అవధూత గీత పేరుతో తన గీతను బోధించారు. వేదాంతం మరియు ఆత్మసాక్షాత్కారం యొక్క అపరోక్షానుభూతి లేదా ప్రత్యక్ష అనుభవం గురించిన ఎన్నో సత్యాలు మరియు రహస్యాలు కలిగిన అత్యంత విలువైన పుస్తకము ఈ అవధూత గీత.