దత్తుడు విష్ణువే
దీపకా! మంచి ప్రశ్నవేశావు. దీనికి తత్త్యదీపన దీపకంగా నేను చెప్పే సమాధానం అత్యంత శ్రద్ధగా ఆలకించు. దత్తుడు- నిశ్చవనుడు- స్తంభుడు- ప్రాణుడు- కశ్వపుడు- ఔర్యుడు - బృహస్పతి- అనే ఏడుగుర్నీ మత్స్యపురాణం మహర్షులుగా పేర్కొంది. జేర్వుడు- వశిష్టపుత్రుడు- స్తంభుడు- కశ్యపుడు - ప్రాణుడు - బృహస్పతి - దత్తుడు- నిశ్చవనుడు అనే ఏడుగుర్నీ మహర్షులు అంటోంది వాయుపురాణం. స్వారోచిషమన్వంతరంలో వీరి పేర్లు వినిపిస్తే దేవతలు సైతం సంబరపడేవారట. ఇది దత్తాత్రేయుని మహర్షిత్వానికి పౌరాణిక నిదర్శనం.
ఇంక అవతార విషయకంగా ప్రమాణం చూపుతున్నాను. ఆలకించు. మత్స్యపురాణంలో నారద మహర్షికి ప్రమధగణ ప్రధముడైన నందీశ్వరుడు వీభూతిద్వాదశీ వ్రతం గురించి వివరిస్తూ ప్రతిమాసమూర్తి భేధన పూజగా విష్ణుమూర్తికి ద్వాదశ ఆవతారాలను చెప్పాడు. దత్తాత్రేయుణ్నీ ముసల సమన్వితుడైన వ్యాసుణ్ని అదనపు ఆవతారాలుగా పరిగణించి నెలకొక్కరుగా పన్నెండుమందినీ పన్నెండు నెలలూ ఆరాధించాలనీ వీభూతి ద్వాదశీ వ్రతం సారాంశం ఉపదేశించాడు.
శ్రీమద్భాగవతం ఏకాదశ స్కందంనాల్లో అధ్యాయంలో నిమి చక్రవర్తికి ద్రుమిళుడు విష్ణుమూర్తి మహిమలను చెబుతూ జగత్కల్యాణం కోసం అతడు హంస- దత్త- సవత్కుమార- ఋషభాద్యవతారాలు ధరించాడని పలికాదు. ఇదే భాగవతంలో షష్టస్కందం అష్టమాధ్యాయంలో నారాయణకవచం చెప్పబడింది. ఉగ్రధన్వుడైన నారాయణుడు నన్ను అఖిల ప్రమాదాల నుండి కాపాడుగాక. హాసం నుండి నరుడు రక్షించుగాక, యోగనాధుడైన దత్తాత్రేయుడు అయోగం నుండి బ్రోచుగాక, కపిలుడైన గణేషుడు కర్మబంధం నుండి తప్పించుగాక.... ఇలా సాగుతుంది ఆ కవచం దీన్ని బట్టి నారాయణాంశ సంభవుడు దత్తాత్రేయుడు అని స్పష్టమవుతుంది.
షష్టస్కందం పంచాదశాధ్యాయంలో చిత్రకేతుడు తనకు కనిపించిన ఒక మహామునిని స్వామి! తమరెవరు? లోమశుడు - చ్యవనుడు - దత్తుడు - ఆసురి - పతంజలి మొదలైన మహానుభావుల్లో ఎవరు మీరు? - అని ప్రశ్నిస్తాడు. హరివంశంలో కూడా మరొక దాఖలా ఉంది. విష్ణుమూర్తి దత్తాత్రేయుడై అవతరించాడనీ వేదాలూ వర్ణాశ్రమధర్మాల యజ్ఞయాగాలూ అడుగంటిపోతే, వాటిని ఉద్దరించాడనీ - కార్తవీర్యుడికి సహస్ర బాహువులూ - అధర్మ నివారణ - పృధివీ విజయం - సంగ్రామంలో అధికుడి చేతిలో మరణం - అనే నాలుగు వరాలూ ఇచ్చి భూగోళాన్ని ధర్మబద్ధంగా ఏలించాడనీ అతడికి అంకితం అయితే రెండు చేతులు వెయ్యి చేతులు అవుతాయనే వైశంపాయనుడు స్వయంగా ప్రశంసించాడు హరివంశంలో.
No comments:
Post a Comment