సామ్రాజ్యలక్ష్మి, విజయలక్ష్మి మిమ్మల్ని వరించడం తధ్యం. ఇదే తగిన సమయం త్వరపడండి. మీరు మీ శస్త్ర అస్త్రాలతో రాక్షసుల విూద విరుచుపడండి. ఇప్పటికే వారు నిర్వీర్యులై వున్నారు. ఇప్పుడు మీరు వారిని జయించడం చాలా తేలిక, బయలుదేరండి.
దేవతలు తమ తమ ఆయుధములు ధరించి రాక్షసుల వెంటబడ్డారు. దొరికిన వాణ్ణి దొరిగినట్లు చావబాదారు. అదేమిటో రాక్షసుల వీరుల నుంచి ఏ కొద్దిపాటి ప్రతిఘటన ఎదురుకాలేదు. అందరూ నీరసంగా వ్రేలాడుతూ వున్నారు. జీవచ్ఛవాలుగా దేవతల చేతికి చిక్కుతున్నారు. దేవతలు ఆనందంతో అరటి చెట్లును తెగ నరికినట్లుగా నరికేశారు. చివరకు జంభాసురుడు కూడా ఇంద్రుడి వజ్రాయుధం వేటుకు నేలకొరిగాడు. లక్ష్మీదేవి బంగారు పల్లకీ నుండి ఎగిరివచ్చి దత్తుడి చెంతకు చేరింది. దేవేంద్రుడు తన సింహాసనం అధిష్టించాడు. ఇంద్రుడు వెంటనే దత్త్యాశ్రమమునకు వచ్చి దత్తుని ముంగిట నిలిచి సాష్టాంగ నమస్కారములు ఆచరించి స్తుతించాడు.
దత్తాత్రేయుడు సంతోషించి ఆశీస్సులు ఇచ్చి పంపాడు. కాబట్టి రాకుమారా, నువ్వు కూడా దత్త యోగీంద్రుణ్ని సేవించి అభీష్ట సిద్ధిని పొందు అని గర్గముని కార్తవీర్యార్జునికి చెప్పాడు.
కార్తవీర్యార్జునుని దత్తోపాసన
కార్తవీర్యార్జునుడు వెంటనే గురువైన గర్గముని వద్ద సుముహుర్తం నిర్ణయించుకొని తమ మంత్రి పురోహితాదులైన పెద్దలైన వారి వద్ద శుభాశీస్సులు అందుకొని రాజ్య బాధ్యతలను వారికప్పగించి సహ్యాద్రి పర్వత ప్రాంతానికి బయలుదేరాడు. దత్తాశ్రమం చేరుకున్నాడు. నిరాడంబర వేషధారణలతో ఒంటరిగా పాదచారియై ఆశ్రమంలోకి చేరుకున్నాడు. మణి శిలాపీఠంపై మదవతీ మధు పాన గోష్టిలో ఓలలాడుతున్న దత్తస్వామిని దర్శించాడు. గోత్ర నామాదులు చెప్పుకొని సాష్టాంగ నమస్కారాలు చేసాడు. దత్తస్వామి ఒక వింతైన చిరునవ్వు విసిరారు. కార్తవీర్యుడు మనస్సు కుదుట పడింది. స్వామి తన రాకను గమనించారని అనుమతించారని సంబరపడ్డాడు. తన జన్మ ధన్యమయిందని మురిసిపోయాడు. అలజడి తగ్గి సంశయాలు తొలగి మనస్సులో క్రమక్రమంగా ధైర్యం బయలు దేరింది. దత్త స్వామికి మరింత చేరువయ్యాడు. దత్తస్వామి పాదాలు తన చొట్ట చేతులతో ఒత్తుతూ నేలపై చతికిల బడి కూర్చున్నాడు. కాసేపటికి దత్త యోగిచేతిలో మధుపాత్రఖాళీ అవటంతో తానే లేచివెళ్ళి మధువును నింపి తెచ్చాడు. బంగారు పళ్ళెదాలలో వున్న మధురమైన ఫలాలను, పదార్థాలను అదనుకని పెట్టి స్వామికి అందిస్తున్నాడు. క్రమక్రమంగా స్వామి దినచర్యలో స్వామి పరిచారక గణంలో కార్తవీర్యుడు ఒక భాగస్వామి అయ్యాడు.
No comments:
Post a Comment