గయాశిర తీర్ధంలో శ్రాద్ధమును పెట్టడాన్ని మించిన పుణ్యకర్మలేదేమో! ఎందుకంటే విత్త పరిపూర్ణ సమస్త పృథ్విని మూడుమార్లు దానం చేస్తే వచ్చే పుణ్యం ఈ శ్రాద్ధకర్మ వల్ల లభిస్తుంది. ఇక్కడ శమీపత్ర పరిమాణంలో పిండాలను తయారుచేసి పెట్టాలి. దాని వల్ల పితృగణాల వారు దేవగణాల వారై పోతారు. ఈ విషయంలో ఎటువంటి అనుమానమూ అవసరం లేదు.
త్రిర్వేత్తపూర్ణ పృథివీం దత్త్వా యత్ ఫలమాప్నుయాత్ ।
సతత్ఫల మవాప్నోతి కృత్వాశ్రాద్ధం గయా శిరే ॥
శమీపత్ర ప్రమానేన పిండం దద్యాడ్ గయాశరే ॥
పితరోయాంతి దేవత్వం నాత్ర కార్యా విచారణా
(ఆచార...84/26-28)
ముండపృష్ఠ తీర్ధంపై పరమేశ్వరుడు తన పాదాలను మోపి విశ్రమించాడు. అందుచేత ఈ తీర్థంలో స్వల్పమాత్రం చేసినా ఘన తపశ్శక్తి, అత్యధిక ఫలాలూ కలుగుతాయి.
గయాశీర్ష తీర్థంలో పేరు పేరునా ఎవరెవరికైతే పిండాలు పెట్టబడతాయో వారిలో నరకంలో వున్నవారు స్వర్గానికి పోగా, స్వర్గంలో నున్నవారు మోక్షాన్ని పొందుతారు.
ముండపృష్ఠే పదంన్యస్తం మహాదేవేన ధీమతా ॥
అల్పేన తపసాతత్ర మహాపుణ్యమవాప్నుయాత్ ।
గయాశీషేతుయః పిండాన్నామ్నా యేషాంతు నిర్వపేత్ ॥
నరకస్థా దివం యాంతి స్వర్ణస్థా మోక్షమాప్నుయుః (ఆచార... 84/28-30)
అయిదవ రోజు గదాలోల తీర్ధంలోస్నానం చేసి అక్కడి అక్షయపటం క్రింద పిండదానం చేసిన వారు తమ కుటుంబం సమస్తాన్నీ ఉద్దరించగలరు. అక్షయ వట మూలం వద్ద శాక, ఉష్ణోదక సహితమైన భోజనాన్ని పెడితే కోటిమంది బ్రాహ్మణులకు అన్నదానం చేసిన ఫలం లభిస్తుంది. ఆ తరువాత బ్రహ్మదేవుని పూజించి, దర్శించి అక్షయ లోకాలను పొందవచ్చు. ఈ మొత్తం కార్యక్రమాన్ని వేరే ఆలోచన లేకుండా భక్తిశ్రద్ధలతో గావించిన వారి నూరుతరాలు ఉద్దరింపబడతాయి.
ఏష్టవ్యా జపానః పుత్రాయ చ్యేకోఽ పి గయాంప్రజేత్ (ఆచార... 84/33)
No comments:
Post a Comment