ఏ తిధినాడు ఏ సమయంలో ఎలా ఈ వ్రతం ఆచరించాలో తెలియజెప్పమని ధర్మరాజు అడిగిన మీదట కృష్ణుడు ఇలా చెప్పాడు. మార్గశిరమాసం కృష్ణపక్షం అష్టమి తిధినాడు ఈ వ్రతం చెయ్యాలి. దర్భలతో అనఘుణ్నీ అనఘాదేవినీ వారి అష్టపుత్రుల్ని ప్రతికృతులు చెయ్యాలి. మండపంలో నెలకొల్పాలి. వ్రతకర్త ఉదయమే లేచి స్నానసంధ్యాధికం ముగించుకుని తోరం కట్టుకుని వ్రతదీక్ష స్వీకరించాలి. భక్తిప్రపత్తులతో ఈ దర్భాకృతులకు షోడశోపచారాలు చెయ్యాలి. ఋగ్వేదోక్త మంత్రాలతో అనఘుడైన విష్ణుమూర్తినీ అనఘయైన లక్ష్మీదేవిని ధ్యానించాలి. స్తుతించాలి. హరివంశ సంభవులైన ప్రద్యుమ్నాది పుత్రవర్గంగా అష్టపుత్రుల్నీ భావించాలి.
ఆ ఋతువులో దొరికే కంద మూలఫలాలనూ సుగంధపరిమళభరితమైన పుష్పాలనూ వినియోగించాలి. ధూప దీపనైవేద్యాలు సమర్పించాలి. ఆపైన బంధుమిత్ర పరివారానికీ బ్రాహ్మణులకూ సమారాధన జరపాలి. మరొకడు ఈ వ్రతాన్ని స్వీకరించేటట్టు చేసి అప్పుడు వ్రతసమాస్తి పలకాలి.
అష్టమి నాటి రాత్రి నట, నర్తక, గాయకుల హరికధా సంకీర్తనంతో భజనలతో జాగరణం చెయ్యాలి. నవమి నాటి ఉదయం అనఘస్వామికి పునఃపూజ చేసి నైవేద్యం పెట్టి ఉద్వాసన చెప్పాలి. ఆపైన ఆదర్భాకుతుల్నీ పత్ర పుష్పాది నిర్మాల్యాన్ని భద్రంగా తీసికెళ్ళి నదిలోగానీ, చెరువులోగానీ, బావిలోగానీ నిమజ్జనం చెయ్యాలి. ఇలా ప్రతి సంవత్సరమూ భక్తిశ్రద్ధలతో ఈ వ్రతాన్ని బ్రతికున్నంతకాలమూ చేస్తే వారికి విష్ణుమూర్తి ప్రసన్నుడవుతాడు. కుటుంబం అన్నింటా అభివృద్ధి సాధిస్తుంది. ఆయురారోగ్యైశ్వర్య భోగభాగ్యాలు లభిస్తాయి. ఏడుతరాలు తరిస్తాయి. పాండవాగ్రణా! నవ్వు కూడా ఈ వ్రతం ఆచరించు. కార్తవీర్యార్జునుడు అంతటివాడివి అవుతావు అని శ్రీకృష్ణుడు శుభాకాంక్ష పలికి ముగించాడు.
దీపకా! ఇదీ దత్తదేవుడి కధాకధనం. జంభ దైత్య పరాజితులైన దేవతల్ని దత్తదేవుడు రక్షించటం, అతడి అనఘత్వం, యోగచర్య, భక్తుడైన కార్తవీర్యయోగికి చేసిన వరదానం, ఈ అనఘతోషణ వ్రతం, ఇలా అన్నీ చెప్పాను. ఇంకా ఏమి వినాలని అనుకుంటున్నావో నిరభ్యంతరంగా అడుగు చెబుతాను. హాయిగా విందువుగాని అని ముగించాడు వేదధర్ముడు.
గురూత్తమా! నాదొక చిలిపి సందేహం. మీరు బ్రహ్మాండాది బహుపురాణవేత్తలు కనుక కోపగించుకోకుండా చెబుతారని అడుగుతున్నాను. దత్తాత్రేయుణ్ని మహర్షి అంటున్నారు. విష్ణుమూర్తి అవతారం అంటున్నారు. యోగులకు యోగి అంటున్నారు. వీటన్నింటికీ ఏమైనా పురాణకాలంలో ఆధారాలు వున్నాయా? అనేది నా సందేహం. నువ్వు దీనవత్సలుడివి. దయచేసి నా సందేహం తీర్చు.
No comments:
Post a Comment