భక్తి
భగవానుడు
మనమేదైనా ఒక ఇంటిని చూస్తే ఎవరో ఒకరు కట్టారని భావిస్తాం. ఒక బండిని చూస్తే తయారు చేసిన మనిషి గుర్తుకు వస్తాడు. నిర్మాణానికి ఒక లక్ష్యముంటుంది. దీని వెనుక ఒక ఆలోచన, బుద్ధి ఉంటుందని అనుకొంటాం కదా! ఒక వరుసలో కొన్ని వస్తువులను పెట్టగా ఈ క్రమానికి ఒక కారకుడుంటాడు.
ఈ విశ్వాన్ని తిలకించినపుడు ఒక పద్ధతిలో నిర్మించిన వాడొకడుండాలని ఊహిస్తాం కదా! మనకుపయోగించే వస్తువులు, ఉపకరణాలను ఏర్పాటు చేసిన వానికి ఎంతో తెలివి, శక్తి ఉండాలని భావిస్తాం.
ఈ ఇల్లు ఎవరు కట్టారంటే చటుక్కున ఫలానా వ్యక్తి పేరు చెబుతాం. ఈ అరటి చెట్టు ఎట్లా తయారయిందని అడిగితే ఆ నిర్మాతను గురించి చెప్పలేం. అయినా ఎవడో తయారు చేసియుండాలి. ఒక్కొక్క పొర మీద ఒక్కొక్క పొరతో ఉంటుంది. అందమైన డొప్పలెట్లా వచ్చాయి? ఏ సాధనం వల్ల ఇట్లా ఉన్నాయి! అట్లాగే ఈ నదీ నదాలు, పర్వతాలను చూసినపుడు వీటికి సృష్టికర్త ఎవరని ప్రశ్నిస్తే చూపించలేము కదా!
ఇవి ఏనాటి నుండో ఉన్నాయి, సృష్టికర్త గురించి అడుగుతారేమిటని తిరిగి ప్రశ్నించవచ్చు. అయితే ఇప్పుడే వికసించిన ఈ గులాబీకి ఎవరు కర్త? నిన్నటి వరకూ మొగ్గగా ఉంది. దీనిలో అనేక దళాలు, సుగంధం పుట్టుకు వచ్చాయి. మన కళ్ల ముందే వికసించింది కదా! అని అడిగితే దీనిని నిర్మించిన వానిని చూపించలేము.
No comments:
Post a Comment