స్వామి అంటే
స్వామి అంటే ఎవరు? స్వం అనగా అధీనము. ఆస్తి, స్వం అనే పదానికి తెలుగులో సొమ్ము, స్వంతం అనే మాటలను కూడా వాడుతాం. అంటే మన ఆధీనంలో ఉందని. కేరళలో దేవాలయానికి చెందిన దానిని దేవస్వం అంటారు. అనగా దీని యజమాని, స్వామియైన భగవానుడే. స్వామిని తమిళంలో ఉడైయార్ అంటారు. ప్రాచీన కాలంలో తమిళనాడులో శాసనాలలో స్వామిని ఉడైయార్ అని చెక్కబడి యుంటుంది. ఉదా: తిరుచిత్రం బలముడైయార్, తిరువేంగడముడైయార్, తిరునాగేశ్వరముడైయార్ మొదలైనవి.
గురువు, భగవానుడూ ఒక్కరే గనుక వైష్ణవులు రామానుజులను ఉడైయార్ అని భక్తితో సంబోధిస్తారు.
స్వామి అంటే ఆస్తి కలవాడని, ఏమిటా ఆస్తి? సమస్త ప్రపంచమూ. మనమందులో ఉన్నాము కనుక, అతని ఆస్తిలో భాగమే. అన్నీ నీవేయని తాయుమానవార్ కీర్తించాడు. కాని మనమేమంటామంటే ఇది నా ఇల్లు, ఇది నా పొలమని అంటాం. కాని అసలు యజమాని అతడే. అతడే కనుక లేకపోతే ఈ ప్రపంచమే లేదు. అందు మనమూ ఉన్నాము, మనకు ఆస్తిహక్కు ఉండదు.
మనమొక ఇంటినో, వస్తువునో తయారు చేస్తాం. శాస్త్రజ్ఞులు క్రొత్త క్రొత్త యంత్రాలను తయారుచేస్తారు. ఎవరేది చేసినా ప్రపంచంలోని వస్తువులను ఆధారం చేసికొనే కదా! ఆ వస్తువుల నిర్మాత, భగవానుడే. మనమతని ఆస్తిని గ్రహించి క్రొత్త క్రొత్త రూపాల్ని చూపిస్తున్నాం. ఇంతకంటే మనం చేసేదేమీ లేదు. ఈ పంచభూతాలను సృష్టించండి, పోనీ, అణువులను నిర్మించండని ఎవరైనా అడిగితే చేయగలమా? మహామహా శాస్త్రజ్ఞుడే చేయలేదు కదా శాస్త్రజ్ఞులొక ఆకును సృష్టించగలరా?
No comments:
Post a Comment